Category Archives: Behind the Scenes

సిరులు కురిపించే ‘కొల్హాపూర్ మహాలక్ష్మి’

Tags :

Category : Behind the Scenes Daily Updates Features Sliders Spiritual

సకల సంపదలకు నిలయం శ్రీ మహాలక్ష్మీ అమ్మవారు. ఆమె కరుణ తమపై ప్రసరించాలని కోట్లాది భక్తులు నిత్యపూజలు చేస్తుంటారు. వైకుంఠంలో వున్న అమ్మవారు భక్తుల కోసం భూమిపై వెలసిన క్షేత్రమే మహారాష్ట్ర కొల్హాపూర్‌లోని శ్రీమహాలక్ష్మీ ఆలయం. నిత్యం వేలాదిమంది భక్తులు ఆమెను దర్శించుకొని పునీతులవుతుంటారు. అష్టదశ శక్తిపీఠాలలో ఎంతో విశిష్టత పొందిన శక్తిపీఠం శ్రీ మహాలక్ష్మి దేవి శక్తిపీఠం. మహాలక్ష్మి అమ్మవారు కోలహాసురుడు అనే రాక్షసుడిని సంహరించి ఇక్కడ వెలసిందని అందుకే కొల్హాపూర్ అనే పేరు వచ్చిందని కొందరు చెబుతుంటా. పద్మావతి పరిణయం వేళ తిరుమలేశుడిపై అలిగిన అమ్మవారు ఇక్కడకు వచ్చి వెలిసిందని మరో కథ ప్రాచుర్యంలో ఉంది.

వైకుంఠపురి నుంచి..

శ్రీమహావిష్ణువు వైకుంఠంలో వుండగా భృగుమహర్షి వచ్చాడు. అయితే రుషి రాకను విష్ణువు గమనించలేదు. దీంతో ఆగ్రహం చెందిన భృగువు స్వామివారి ఎదపై కాలుపెట్టారు. దీంతో ఆగ్రహించిన లక్ష్మీదేవి భూలోకానికి వెళ్లి కొల్హాపూర్‌ సమీపంలో తపస్సులో మునిగిపోయింది. భృగువు పాదంలో కన్నును లౌక్యంగా తీసివేసిన మహావిష్ణువు రుషి గర్వాన్ని అణచివేశాడు. అనంతరం అమ్మవారి కోసం అన్వేషిస్తూ తిరుమలలో శ్రీ వేంకటేశ్వరుడిగా అవతరించినట్టు పురాణాలు పేర్కొంటున్నాయి. కొల్హాపురంలో వెలసిన అమ్మవారి ప్రాశస్త్యం అందరికి తెలియడంతో క్షేత్రం అందరికి దర్శనకేంద్రంగా మారింది.

ప్రళయంలోనూ చెక్కుచెదరదు..

ఈ ప్రాంతాన్ని కర్వీర్‌గా వ్యవహస్తారు. ఆ మహాదంపతులకు ఇష్టమైన ప్రదేశం కావడంతో మహాప్రళయంలోనూ చెక్కుచెదరదు. అందుకనే ఈ క్షేత్రాన్ని అవిముక్తేశ్వర క్షేత్రమని పేర్కొంటారు. లోకమాత జగదాంబ ఈ క్షేత్రాన్ని సృష్టించింది. అందుకనే ఎన్నో వేల సంవత్సరాల నుంచి ఈ ప్రాంతంలో మహర్షులు, రుషులు పూజలు చేసినట్టు చారిత్రక ఆధారాలు పేర్కొంటున్నాయి. అమ్మవారి తపస్సు అనంతరం ఒక్క రాత్రిలోనే ఈ ఆలయాన్ని నిర్మించినట్టు తెలుస్తోంది.

అరుదైన శిలపై అమ్మవారి రూపం..
శ్రీమహాలక్ష్మీదేవి విగ్రహాన్ని అరుదైన శిలపై చెక్కారు. నాలుగు హస్తాలు కలిగి భక్తులను దీవిస్తున్న రూపం మనల్ని ఆకట్టుకుంటుంది. ఫలం, గద, కవచం, పాత్రను నాలుగుచేతుల్లో కలిగివున్న దివ్యమంగళరూపం భక్తులకు ఎల్లప్పుడూ ఆశీర్వచనాలు ఇస్తుంటుంది. అంబా బాయిగా ఆమెను భక్తులు ఆరాధనతో పిలుస్తారు. ఆలయంలో ప్రతిరోజు జరిగే కార్యక్రమాలు భక్తులను విశేషంగా ఆకర్షిస్తాయి. శక్తిపీఠాల్లో కూడా కొల్హాపూర్‌ ఒకటి కావడం విశేషం.

కిరణోత్సవం..

సూర్యదేవుడు అమ్మవారి కటాక్షం కోసం ఏటా మూడురోజులు గర్భాలయంలోకి సూర్యకిరణాలను ప్రసారిస్తాడు. తొలిరోజు పాదాలకు, రెండో రోజు నడుము భాగానికి మూడోరోజు శిరస్సు భాగానికి కిరణాలు ప్రసారిస్తాయి. ఈ ఉత్సవాలను కిరణ్‌ ఉత్సవ్‌గా వ్యవహరిస్తారు. ఈ దినాల్లో అమ్మవారిని దర్శనం చేసుకునేందుకు వేలాదిమంది భక్తులు కొల్హాపూర్‌కు చేరుకుంటారు. క్షీరసాగర మథనంలో జన్మించిన శ్రీలక్ష్మీదేవిని సాక్షాత్తూ శ్రీమహావిష్ణువు తన హృదయేశ్వరిగా స్వీకరిస్తారు. నారాయణిగా ప్రసిద్ధికెక్కిన లక్ష్మీదేవి ఎక్కడ వుంటే అక్కడ సిరిసంపదలకు లోటువుండదు. ఆమె కటాక్షం కోసం యావత్‌ మానవాళి ప్రార్థిస్తుంది. స్వయంగా ఆమె తపస్సు చేసి వెలసిన ప్రాంతమే కొల్హాపురం. అందుకనే ఆ నగరంలో పేదరికం వుండదని సామెత. సహకార ఉద్యమంలో కొల్హాపూర్‌ కీలకమైన భూమిక పోషించింది. చక్కెర మిల్లులు ఎక్కువగా వుండటంతో భారతదేశానికి చక్కెర కేంద్రంగా మారింది. ప్రతి ఏడాది శరన్నవరాత్రి ఉత్సహావాలు వైభవంగా జరుపుతుంటారు. చైత్ర పూర్ణిమ రోజున జరిగే ఉత్సవంలో అమ్మవారి ఊరేగింపు జరుగుతుంది. ఇక్కడ అమ్మవారిని అంబబాయి అని కరివీర్ మహాలక్ష్మి అనే పేరులతో పిలుస్తారు. ఈఆలయ ప్రాంగణం అంతా అలనాటి రాజ సంస్కృతుల సాంప్రదాయలతో కనిపిస్తాయి.

చూడదగిన ప్రదేశాలు
లక్ష్మీదేవి ఆలయం గర్భగుడి ముందు 100 అడుగుల పొడవుగల మండపం ఉంటుంది. గర్భగుడిలో ఆరడుగుల చదరంగా ఉన్న ఎత్తైన వేదిక మీద రెండడుగుల పీఠం, దాని మీద మహాలక్ష్మి అమ్మవారు విగ్రహం కుర్చొని ఉన్న స్థితిలో ఉంటుంది. ఈ ఆలయ ప్రాంగణంలో విరోబా ఆలయంఉంది. విద్యాబుద్ధులు ప్రసాదించే తల్లి అయిన శారదా అమ్మవారు ఇక్కడ కొలువై ఉన్నారు. అలాగే కాళికా అమ్మవారు ,అతిబలేశ్వర స్వామి విగ్రహం కూడా ఉంది.

ఎలా వెళ్లాలి..
దేశంలోని ప్రధాన నగరాలతో కొల్హాపూర్‌కు రోడ్డు, రైలు మార్గాలున్నాయి.
హైదరాబాద్‌ నుంచి రోడ్డు మార్గంలో దూరం 540 కి.మీ.
పుణె, ముంబాయి విమానాశ్రయాల నుంచి కొల్హాపూర్‌కు రోడ్డుమార్గాన చేరుకోవచ్చు.

వరలక్ష్మీ వ్రతం రోజు ఈ తప్పులు అస్సలు చేయొద్దు

Tags :

Category : Behind the Scenes Daily Updates Features Sliders Spiritual

శ్రావణమాసంలో పౌర్ణమికి ముందు వచ్చే శుక్రవారం రోజు వరలక్ష్మీ వ్రతాన్ని మహిళలు ఆచరిస్తారు. వరాలిచ్చే చల్లని తల్లి అయిన వరలక్ష్మీ దేవిని అత్యంత భక్తిశ్రద్ధలతో పూజిస్తే కోరుకున్న కోరికలన్నీ తీరుతాయని, సకల సంపదలతో తులతూగుతామని, మహిళలు ముత్తయిదువులుగా జీవిస్తారని ప్రగాఢంగా విశ్వసిస్తారు.

వరలక్ష్మీ వ్రతానికి సంబంధించి ఓ కథ ప్రచారంలో ఉంది. కోరిన వారందరికీ కోరికలను తీర్చి, అందరిని కటాక్షించి లక్ష్మీదేవి ఒకనాటి రాత్రి సమయంలో చారుమతికి కలలో కనిపించి వరలక్ష్మీ వ్రతాన్ని ఆచరించాలి అని చెప్పింది. శుక్రవారం రోజున వరలక్ష్మీ వ్రతాన్ని ఆచరిస్తే ధన, కనక, వస్తు, వాహనాలు సమకూరుతాయి అని వరలక్ష్మీదేవి చారుమతికి వివరించింది. శ్రావణ శుక్రవార వ్రతాలతో పాపాలన్నీ తొలగిపోయి లక్ష్మీదేవి అనుగ్రహం కలుగుతుందని చెప్పింది. అప్పటినుండి చారుమతి వరలక్ష్మీ వ్రతాన్ని ఆచరించగా, ఆపై వివాహిత మహిళలు అందరూ ఈ వ్రతాన్ని అత్యంత భక్తి శ్రద్ధలతో ఆచరిస్తున్నారు.

శ్రావణ మాసంలో వచ్చే రెండవ శుక్రవారం రోజు వరలక్ష్మీ వ్రతం అందరూ చేసుకుంటారు. రెండో శుక్రవారం ఆచరించడానికి మహిళలకు వీలుకాకపోతే, ఆ తర్వాత వచ్చే శుక్రవారాలలో కూడా వరలక్ష్మీ వ్రతాన్ని ఆచరించవచ్చు. శ్రావణ మాసంలో చేసే వరలక్ష్మి పూజ భక్తిభావంతో, అత్యంత నియమ నిష్టలతో చేయాలి. వరలక్ష్మీ వ్రతం చేసే సమయంలో కొన్ని పొరపాట్లను చేస్తే లక్ష్మీ దేవికి కోపం వస్తుంది. దీంతో వారు అష్టకష్టాలు పడాల్సి వస్తుంది. వరలక్ష్మీ వ్రతం సందర్భంగా చెయ్యకూడని పొరపాట్లను గురించి ఇప్పుడు తెలుసుకుందాం.

చేయకూడని తప్పులివే…

వరలక్ష్మీ వ్రతం నాడు కలశాన్ని ఏర్పాటు చేసుకున్న వారు, ఆ కలశాన్ని గాజు ప్లేట్లలో పెట్టకూడదు. వెండి ప్లేట్ లో కానీ, రాగి ప్లేట్లలో కానీ కలశాలను ఏర్పాటు చేసుకోవాలి.

వరలక్ష్మీ వ్రతం నాడు ముందు పసుపు గణపతిని పూజ చేసిన తర్వాతే లక్ష్మీదేవి పూజ ప్రారంభించాలి. ఏ పూజ చేసినా ముందు పూజించవలసినది ఆది గణపతినే. గణపతి పూజ చేయకుండా లక్ష్మీ పూజ చేయకూడదు.

వరలక్ష్మీ వ్రతం నాడు ఇంట్లో అందరి సహకారం లేకపోతే అది దోషం. వరలక్ష్మీ వ్రతం చేసుకుంటున్న ఇంట్లో ప్రతి ఒక్కరూ ఆ పూజలో భాగస్వాములు కావాలి. అందరూ అమ్మవారిని అంతే భక్తి శ్రద్ధలతో పూజించాలి. ఇంట్లో మహిళలు చేసుకుంటున్నారు. మాకేం సంబంధం లేదు అన్నట్టు ఏ ఒక్కరు ఉండకూడదని పెద్దలు చెబుతున్నారు.

శక్తి కొలది, భక్తితో అమ్మవారికి పూజ చేసి, నివేదన చేయాలని, మనసులో భక్తి లేకుండా ఫార్మాలిటీగా పూజలు చేయకూడదని చెబుతున్నారు. ప్రతి సంవత్సరం చేస్తున్నాను కాబట్టి తప్పదు అన్న చందంగా ఎవరు అమ్మవారిని పూజించకూడదు.

మందేశ్వరస్వామి (శనీశ్వర) ఆలయం.. ఇలా చేస్తే శనిదోషాలన్నీ తొలగిపోతాయి

Tags :

Category : Behind the Scenes Features Sliders Spiritual

హిందూ దేవాలయాల్లో అనేక చోట్ల శని గ్రహము నవగ్రహాలలో ఒక భాగంగా ఉంటుంది. అయితే కొన్ని పుణ్యక్షేత్రాల్లో మాత్రం కేవలం శనీశ్వరుడిని మాత్రమే పూజిస్తుంటారు. అలాంటి ఆలయాలు దేశవ్యాప్తంగా చాలా ఉన్నాయి. అలాంటి పుణ్యక్షేత్రాల్లో ఒకటే మందపల్లిలోని శ్రీ మందేశ్వర స్వామి ఆలయం. ఈ క్షేత్రంలోని శివలింగాన్ని ఆ శనేశ్వరుడే ప్రతిష్టించాడని భక్తులు విశ్వసిస్తారు. పురాణ ప్రాధాన్యత కలిగిన ఈ విశిష్టమైన దేవాలయానికి సంబంధించిన ఓ కథ ప్రాచుర్యంలో ఉంది.

మందపల్లి పూర్వం దట్టమైన అరణ్యంగా ఉండేది. ఈ ప్రాంతంలో కైటభుడనే రాక్షసుడు ఉండేవాడు. అతని కుమారులే అశ్వర్థుడు, పిప్పలుడు. వీరిద్దరు మారు రూపాల్లో తిరుగుతూ ఈ అటవీ ప్రాంతంలో తమస్సు చేయడానికి వచ్చే మునులు, వేదాలను నేర్చుకోవడానికి వచ్చే వారిని చంపి తినేవారు. ఈ నేపథ్యంలోనే అగస్త్య మహర్షి దక్షిణ దేశ యాత్రలో భాగంగా మందపల్లి ప్రాంతానికి వస్తారు. అక్కడ ఉన్న మునులు అగస్త్య మహర్షికి ఇక్కడ జరుగుతున్న విషయాలన్నీ చెప్పి తమను ఆ రాక్షసుల బారి నుంచి కాపాడాల్సిందిగా వేడుకొంటారు. దీంతో అగస్త్య మహాముని బాగా ఆలోచించి ఇక్కడ గోదావరి తీరంలో శివుడి గురించి తపస్సు చేస్తున్న శనేశ్వరుడి దగ్గరకు మునులను తీసుకువెళుతాడు. ఆ రాక్షసులను సంహరించి తమను కాపాడాల్సిందిగా మునులు శనీశ్వరుడిని వేడుకొంటారు.

వీరి అభ్యర్థనను సున్నితంగా తిరస్కరించిన శనీశ్వరుడు తాను ప్రస్తుతం శివుడి గురించి తపస్సు చేస్తున్నానని తమస్సు వల్ల వచ్చిన శక్తితోనే ఆ రాక్షసులను సంహరించగలనని చెబుతాడు. దీంతో మునులు బాగా ఆలోచించి తమ తప:శక్తిని శనీశ్వరుడికి ధారపోయడానికి అంగీకరిస్తారు. ఈ ప్రతిపాదనకు అంగీకరించిన శనీశ్వరుడు అశ్వర్థుడు, పిప్పలుడులను సంహరించడానికి అంగీకరిస్తాడు. ప్రథకం ప్రకారం మొదట శనీశ్వరుడి ఒక ముసలి బ్రాహ్మణుడి రూపంలో రావి చెట్టు రూపంలో ఉన్న అశ్వర్థుడి వద్దకు వెళుతాడు. వచ్చినవాడు సాధారణ బ్రాహ్మనుడేననని బ్రమించిన అశ్వర్థుడు శనీశ్వరుడిని అమాంతం మింగేస్తాడు. దీంతో శనీశ్వరుడు ఆ అశ్వర్థుడి కడుపులోకి వెళ్లి అతని ప్రేగులను తెంపేస్తాడు. దీంతో అశ్వర్థుడు విలవిల్లాడుతూ ప్రాణాలు వదిలేస్తాడు. ఆ తర్వాత పిప్పలుడి వద్దకు బ్రాహ్మణ యువకుడి రూపంలో వెళ్లి తనకు వేదాలు నేర్పించాల్సిందిగా కోరుతాడు. పిప్పలుడు కూడా వచ్చినవాడు సాధారణ బ్రాహ్మణుడే అని భావించి శనీశ్వరుడిని మింగేస్తాడు. ఇక్కడ కూడా శనీశ్వరుడు పిప్పలుడి కడుపులోకి వెళ్లి అతని ప్రేగులను తెంపి సంహరిస్తాడు.

అనంతరం ఆ ఇద్దరి అసురుల సంహారం వల్ల కలిగిన బ్రహ్మహత్యా పాతకాన్ని నివారించుకొనేందుకు మందపల్లిలో శనీశ్వరుడు ఒక లింగాన్ని ప్రతిష్టించి దానికి సోమేశ్వరుడని పేరు పెడుతాడు. అయితే ఈ శివలింగం శనీశ్వరుడు ప్రతిష్టించడం వల్ల అదే పేరుతో అంటే శనేశ్వరాలయంగా ప్రసిద్ధి చెందింది. ఈ ఆలయ నిర్మాణంతో పాటు ఇక్కడి పూజా విధానాలు కూడా కొంత విభిన్నంగా ఉంటాయి. శత్రు, రోగ, రుణ బాధల నుంచి విముక్తి కోసం వేలాది మంది భక్తులు ఈ దేవాలయాన్ని సందర్శిస్తుంటారు. వీరిలో జాతక చక్రంలో శని వల్ల సమస్యలున్నవారే ఎక్కువ. అదే విధంగా కోర్టు కేసులు, శత్రు భయం, రోగాలు, రుణాల నుంచి విముక్తి కోసం స్థానికులే కాకుండా దేశంలోని వివిధ ప్రాంతాల నుంచి ఇక్కడకు నిత్యం వేల సంఖ్యలో భక్తులు ఇక్కడికి వస్తుంటారు. తమ కోర్కెలు తీరితే స్వామివారికి ముడుపులు తప్పకుండా చెల్లించేస్తుంటారు. ఈ ఆలయంలోనే సప్తమాత్రుకలు ప్రతిష్టించినట్లు చెప్పే పార్వతీ దేవి విగ్రహం ఉంది. అదే విధంగా అష్టమహా నాగుల్లో ఒకడైన కర్కోటకుడచే ప్రతిష్టించిన శివలింగాన్ని కూడా దర్శించుకోవచ్చు. అటు పక్కనే గౌతమి మహర్షి ప్రతిష్టించిన శ్రీ వేణుగోపాలస్వామి విగ్రహాన్ని దర్శించుకోవచ్చు.

శనివారం రోజున వచ్చే త్రయోదశి, మహాశివరాత్రి, శనివారం రోజున వచ్చే అమావాస్య రోజున ఈ క్షేత్రంలో విశేష పూజలు నిర్వహిస్తుంటారు. ఆ రోజుల్లో ఇక్కడకు లక్షల్లో భక్తులు వస్తుంటారు. ఆ రోజుల్లో శనీశ్వరుడికి తైలంతో అభిషేకం చేస్తారు. ఇందుకు అవసరమైన వస్తువులన్నీ దేవాలయం ప్రాంగణంలోనే దొరుకుతాయి. పూజ తర్వాత నల్లటి వస్త్రాలను దానం చేస్తారు. ఇక పూజలో మిగిలిపోయిన వస్తువులను ఇంటికి తీసుకువెళ్ల కూడదనేది ఇక్కడ అనాదిగా వస్తున్న ఆచారం. అదేవిధంగా ఆలయం నుంచి బయటికి వెళ్తూ వెనక్కి తిరిగి చూడకూడదని పూజారులు హెచ్చరిస్తూ ఉంటారు. ఇందుకు విరుద్ధంగా నడుచుకొంటే శని దోషం మళ్లీ చుట్టుకుంటుందని వారు చెబుతుంటారు. అందువల్లే పూజ తర్వాత ఎవరూ వెనక్కు తిరిగి చూడరు. కోనసీమ జిల్లాలో ముక్తేశ్వరం-కొత్తపేట మార్గంలో ఈ క్షేత్రం ఉంది. రాజమండ్రి నుంచి మందపల్లి ఆలయానికి 38 కిలోమీటర్ల దూరం. దేశంలోని ఎక్కడి నుంచైనా బస్సు, రైలు, విమాన మార్గాల్లో రాజమండ్రి చేరుకుని.. మందపల్లికి రోడ్డుమార్గంలో వెళ్లొచ్చు.

మంగళవారం చేయాల్సిన, చేయకూడని పనులు

Tags :

Category : Behind the Scenes Daily Updates Features Sliders Spiritual

మంగళ వారం కొన్ని పనులు చేయాలి, మరికొన్ని చేయకూడదని పెద్దలు చెబుతుంటారు. మంగళవారం కుజునికి సంకేతం. కుజుడు ధరత్రీ పుత్రుడు, భూమిపై నివసించేవారికి కుజ ప్రభావం ఎక్కువగా ఉంటుంది. కుజుడు ప్రమాదాలకు, కలహాలకు, నష్టాలకు కారకుడు. అందుకనే సాధారణంగా కుజగ్రహ ప్రభావం ఉండే మంగళవారం నాడు శుభకార్యాలు తలపెట్టరు.

మంగళవారం చెయకూడని పనులు


➤ మంగళవారం గోళ్ళు కత్తిరించడం, క్షవరం లాంటివి చేయకూడదు.
➤ మంగళవారం అప్పు ఇస్తే ఆ డబ్బులు మళ్ళీ రావడం చాలా కష్టం.
➤ అప్పు తీసుకుంటే అది అనేక బాధలకు, అనవసరమైన పనులకు ఖర్చు అయిపోయి, తీరకపోయే ప్రమాదం ఉంది.
➤ మంగళవారం కొత్త బట్టలు వేసుకోకూడదు.
➤ అత్యవసరం అయితే తప్ప మంగళవారం ప్రయాణాలు పెట్టుకోకూడదు.
➤ మంగళవారం ఉపవాసం చేసిన వారు రాత్రి ఉప్పు వేసిన పదార్ధాలు తినకూడదు.
➤ దైవకార్యాలకు, విద్యా వైద్య రుణాలు ఎప్పుడైనా ఇవ్వవచ్చు.

మంగళవారం చేయవలసిన పనులు

➤ మంగళవారం ఆంజనేయుడిని ధ్యానించడం వలన ధైర్యం చేకూరి, అన్ని పనులు పూర్తవుతాయి.
➤ సుబ్రమణ్యస్వామి ఆరాధన చేయడం వలన కుజగ్రహ ప్రభావం వలన కలిగే ప్రమాదాలను నివారించవచ్చు.
➤ మంగళవారం కాళికాదేవిని ధ్యానించడం వలన శత్రువులపై జయం కలుగుతుంది.
➤ మంగళవారం ఎరుపు రంగు దుస్తులను ధరించడం, ఎరుపు రంగు పువ్వులతో ఇష్టదైవాన్ని ప్రార్ధిస్తే మంచి ఫలితం ఉంటుంది.
➤ జాతకంలో కుజగ్రహం వక్ర దృష్టితో చూస్తే ఎరుపు రంగు దుస్తులను ధరించరాదు.
➤ మంగళవారం అప్పు తీరిస్తే మళ్లీ కొత్త అప్పులు తీసుకునే అవసరం తగ్గుతుంది.
➤ మంగళవారం నాడు బ్యాంకు అకౌంట్ లో ఎంతో కొంత డబ్బు వేస్తే వృద్ది అవుతూ ఉంటుంది.
➤ మంగళవారం రాహుకాలంలో..( మధ్యాహ్నం 3 నుంచి 4.30 వరకు) దుర్గాదేవి దర్శనం.. దుర్గా స్తోత్రాలు పారాయణము చేయడం వలన ఆధ్యాత్మిక శక్తి పెరుగుతుంది.
➤ హనుమంతుడికి సింధూరంతో పూజించడం వలన, సుబ్రమణ్యస్వామికి పదకొండు ప్రదక్షణలు చేయడం వలన దోష ప్రభావం తగ్గుతుంది.

అలనాటి హాస్యనటుడు సారథి కన్నుమూత

Tags :

Category : Behind the Scenes Daily Updates Movie News Sliders

తెలుగు చిత్ర పరిశ్రమలో మరొ విషాదం చోటుచేసుకుంది. తన కామెడీతో తెలుగు చిత్ర పరిశ్రమలో చెరగని ముద్ర వేసుకున్న ప్రముఖ కమెడియన్ సారధి సోమవారం(ఆగస్ట్ 1) కన్నుమూయడంతో ఇండస్ట్రీలో ఒక్కసారిగా విషాదఛాయలు అలముకున్నాయి. ఎన్నో వైవిధ్యమైన చిత్రాలతో ఆకట్టుకున్న సారథి అంటే తెలియని సినీ ప్రముఖులు ఉండరు. కేవలం ఒక నటుడిగానే కాకుండా ఆయన చిత్ర పరిశ్రమలో ఎన్నో సంక్షేమ కార్యకలాపాల్లో కూడా పాల్గొన్నారు. సినిమా పరిశ్రమకు ఆయన చేసిన సేవ ఎన్నటికీ మరువలేనిది అని చాలామంది సినీ ప్రముఖులు చెబుతూ ఉంటారు.

వయసు రీత్యా కొంతకాలంగా అనారోగ్యంతో బాధపడుతున్న సారథి సోమవారం ఉదయం హైదరాబాద్‌లోని సిటీ న్యూరో సెంటర్ హాస్పిటల్ లో కన్నుమూశారు. ఆయన పూర్తి పేరు కడలి జయ సారధి. ఇటీవల 83వ వసంతంలో అడుగుపెట్టిన ఆయన హఠాత్తుగా కన్నుమూయడం అందరిని షాక్ గురి చేసింది. సినిమాలకు స్వస్తి చెప్పిన అనంతరం ఆయన ఎక్కువగా తన సొంత గ్రామంలో వ్యవసాయం చేస్తూ ప్రశాంతమైన జీవితం గడుపుతున్నారు.

1960లో ‘సీతారామ కళ్యాణం’ అనే సినిమాతో వెండితెరకు పరిచయమైన సారథి ఆ తర్వాత అనేక సినిమాల్లో హాస్య పాత్రల్లో కనిపించి ఎంతగానో మెప్పించారు. తెలుగు చిత్ర పరిశ్రమలో దాదాపు 372 సినిమాల్లో నటించారు. అప్పట్లో తెలుగు చిత్ర పరిశ్రమ మద్రాసులోనే ఉండేది. సీనియర్ నటీనటులు అందరూ ఎలాగైనా తెలుగు రాష్ట్రంలోనే తెలుగు చిత్ర పరిశ్రమ ఉండాలని చేసిన పోరాటంలో సారథి క్రియాశీలకంగా వ్యవహరించారు. మద్రాసు నుంచి తెలుగు చిత్ర పరిశ్రమ హైదరాబాద్‌కు వచ్చిన తర్వాత మూవీ ఆర్టిస్ట్ అసోసియేషన్ బలపడడంలో కూడా ఆయన పాత్ర ఎంతో ఉంది. ఆంధ్రప్రదేశ్ సినీ కార్మికుల సంస్థకు కూడా ఆయన వ్యవస్థాపక కోశాధికారిగా కూడా పనిచేశారు. నాటక రంగంలో ఎన్నో సేవలు చేశారు. నరసింహరావు, రేలంగి, వెంకట్రామయ్య, బి.పద్మనాభం వంటి మహానటులతో కూడా ఆయన నాటక రంగంలో కలిసి నటించారు.

సారధి కేవలం నటుడిగానే కాకుండా నిర్మాతగా కూడా కొన్ని సినిమాలను నిర్మించారు. ధర్మాత్ముడు. అగ్గిరాజు, శ్రీరామచంద్రుడు అనే చిత్రాలను నిర్మించిన ఆయన మంచి విజయాలను సొంతం చేసుకున్నారు. రెబల్ స్టార్ కృష్ణంరాజుతో ఆయన ఎంతో సన్నిహితంగా ఉండేవారు. కృష్ణంరాజుతో సోదర భావంతో కనిపించేవారు. కృష్ణంరాజు నిర్మించిన చాలా సినిమాలకు మ్యూజిక్ సిటింగ్స్‌‌లో పాల్గొంటూ పనులను దగ్గరుండి చూసుకునేవారు. తెలుగు చిత్ర పరిశ్రమలో పేద సినీ కార్మికులకు చాలాసార్లు అండగా నిలిచారు. ముఖ్యంగా చిత్రపురి కాలనీ నిర్మాణంలో కీలకపాత్ర పోషించారు.

‘రామారావు ఆన్ డ్యూటీ’ రివ్యూ

Tags :

Category : Behind the Scenes Latest Reviews Movie Reviews Movie Reviews by Telugu Box Office Sliders

చిత్రం: రామారావు ఆన్‌ డ్యూటీ
నటీనటులు: రవితేజ, రజిషా విజయన్, దివ్యాంశ కౌశిక్‌, వేణు తొట్టెంపూడి, నాజర్, సీనియర్ నరేష్, పవిత్ర లోకేష్, ‘సార్‌పట్ట’ ఫేమ్ జాన్ విజయ్, చైతన్య కృష్ణ, తనికెళ్ల భరణి, రాహుల్ రామకృష్ణ, మధుసూదన్ రావు, సురేఖ వాణి తదితరులు
సంగీతం: సామ్ సీఎస్‌
ఛాయాగ్రహ‌ణం: సత్యన్ సూర్యన్
కూర్పు: ప్రవీణ్ కెఎల్
క‌ళ‌: సాహి సురేష్
నిర్మాత: సుధాకర్ చెరుకూరి
నిర్మాణ సంస్థలు: ఎస్‌ఎల్‌వి సినిమాస్ ఎల్ఎల్‌పి, రవితేజ టీమ్‌వర్క్స్
కథ, స్క్రీన్‌ప్లే, మాటలు, దర్శకత్వం: శరత్ మండవ
విడుద‌ల తేదీ‌: 29-07-2022

మాస్ హీరో సినిమా విడుద‌ల‌వుతోందంటే చాలు టాలీవుడ్ బోలెడ‌న్ని ఆశ‌ల‌తో బాక్సాఫీస్‌ వైపు చూస్తోంది. మునుప‌టిలా థియేట‌ర్ నిండుతుందా?.. ఎప్పట్లా సంద‌డి క‌నిపించేనా అని. ప్రేక్షకుల్ని ఇదివ‌ర‌క‌టిలా ఉత్సాహంగా థియేట‌ర్‌కి తీసుకొచ్చే సినిమాల్లేక, రాక కొన్నాళ్లుగా బాక్సాఫీసు క‌ళ త‌ప్పింది‌! ఈ వారం మాస్ హీరో ర‌వితేజ సినిమా ‘రామారావు ఆన్ డ్యూటీ’ విడుద‌లైంది. ప్రచార చిత్రాలు ఆస‌క్తిని రేకెత్తించాయి. మరి ఈ చిత్రం ఎలా ఉంది?. రవితేజ ప్రభుత్వ అధికారిగా ఏం చేశారు? అనేది రివ్యూలో చూద్దాం.

రామారావు (ర‌వితేజ‌) ఓ డిప్యూటీ క‌లెక్టర్‌. నిజాయ‌తీగా విధులు నిర్వర్తిస్తాడ‌ని పేరు. అనుకోకుండా త‌న సొంత ఊరికి బదిలీ అవుతాడు. చిత్తూరు జిల్లాల్లోని ఆ ఊరిని కేంద్రంగా చేసుకుని ఎర్రచంద‌నం మాఫియా అక్రమాలకి పాల్పడుతుంటుంది. చిన్నప్పట్నుంచి త‌నతో క‌లిసి చ‌దువుకున్న మాలిని (ర‌జీషా విజ‌య‌న్‌) క‌ష్టంలో ఉంద‌ని తెలుసుకుని రామారావు ఆమె దగ్గరికి వెళ‌తాడు. ఆమె భ‌ర్త మిస్సింగ్ అని, అత‌న్ని వెతక‌డం కోసం వెళ్లిన మావ‌య్య కూడా ప్రమాదంలో మ‌ర‌ణించాడ‌ని తెలుసుకుంటాడు. ఆమెకి సాయం చేయాల‌ని రంగంలోకి దిగుతాడు రామారావు. ఈ క్రమంలో ఎర్రచంద‌నం మాఫియా వెలుగులోకి వ‌స్తుంది. మాలిని భ‌ర్తలాగే, ఆ ఊరికి చెందిన మ‌రో 20 మంది పేద‌ల్ని ఆ మాఫియా బ‌లి తీసుకుంద‌ని ప‌సిగ‌డ‌తాడు. మ‌రి ఆ మాఫియాని రామారావు ఎలా బ‌య‌టికి లాగాడు? ఆ క్రమంలో ఎలాంటి స‌వాళ్లు ఎదుర‌య్యాయనేదే సినిమా.

రామారావు పాత్రలో రవితేజ తన అనుభవాన్ని చూపిస్తాడు. ఓ ప్రభుత్వ అధికారి తలుచుకుంటే ఏమైనా చేయగలడని నిరూపిస్తాడు. ఓ డిప్యూటీ కలెక్టర్‌కు, ఎమ్మార్వోకు ఇన్ని అధికారులున్నాయా? అని అనిపించేలా ఈ పాత్ర తెరపై దూసుకుపోతుంది. ఇక రామారావుగా రవితేజ మెప్పించేస్తాడు. యాక్షన్, రొమాన్స్ ఇలా అన్ని యాంగిల్స్‌లో రవితేజ అభిమానులకు నచ్చేస్తాడు. అయితే కొన్నిచోట్ల మాత్రం రవితేజ వయసు వల్ల వచ్చిన మార్పులు స్పష్టంగా తెరపై కనిపిస్తాయి. చాలా ఏళ్ల తరువాత ఎంట్రీ ఇచ్చిన వేణుకి మాత్రం ఈ పాత్ర, ఈ సినిమా అంతగా ఉపయోగపడకపోవచ్చు. ఇదేమీ అంత గొప్ప పాత్రలా అనిపించదు. కానీ వేణు మాత్రం అక్కడక్కడా నవ్వించే ప్రయత్నం చేశాడు. ఇక హీరోయిన్లిద్దరివీ అంత పెద్ద పాత్రలేమీ కాదు. ఓ సీన్, ఓ సాంగ్ అన్నట్టుగా ఉంటుంది. కానీ రజిష, దివ్యాన్షలు కనిపించినంత సేపు తెరపై ఆకట్టుకుంటారు. నరేష్, పవిత్రలు స్క్రీన్‌పై కనిపిస్తే ఈలలు, గోలలతో థియేటర్ దద్దరిల్లిపోయింది. వారి పాత్రలకు అంత ఇంపార్టెన్స్ లేకపోయినా.. థియేటర్లో మాత్రం ఇంపాక్ట్ చూపించారు. నాజర్, సమ్మెట గాంంధీ, జాన్ విజయ్, రాహుల్ రామకృష్ణ ఇలా అందరూ కూడా చక్కగా నటించేశారు.

1990 కాలంలో సాగే ఓ ప‌రిశోధ‌నాత్మక క‌థ ఇది. కాలం ఏదైనా కావొచ్చు కానీ, ఇలాంటి నేర నేప‌థ్యంతో కూడిన క‌థ‌ల్లో ఓ వేగం క‌నిపించాలి. త‌ర్వాత ఏం జ‌రుగుతుంద‌నే ఉత్సుక‌త రేకెత్తాలి. ఈ రెండూ ఈ సినిమాలో మిస్సయ్యాయి. ఇక్కడ హీరో ర‌వితేజ కాబ‌ట్టి ఆయ‌న శైలి, మాస్ అంశాల‌కి సంబంధించిన లెక్కలు చూసుకుంటూ ఈ క‌థ‌ని న‌డిపిన‌ట్టు అనిపిస్తుంది. నిజానికి ఇలాంటి క‌థ‌ల్ని మాస్ హీరోలతో ప‌క్కాగా తీస్తే ఆ ఫ‌లితం, ప్రేక్షకుల్లో క‌లిగే ఆ అనుభూతి వేరుగా ఉంటాయి. కానీ, ద‌ర్శకుడు హీరో ఇమేజ్‌నీ, వాస్తవిక‌త‌తో కూడిన ఈ క‌థ‌నీ బ్యాలెన్స్ చేయ‌లేక‌పోయాడు. హీరోయిజం ఎపిసోడ్‌తో క‌థ‌ని మొద‌లుపెట్టాడు ద‌ర్శకుడు. ప్రథ‌మార్ధంలో కుటుంబ నేప‌థ్యం, మాలినితో ప్రేమ‌, ఆమె పెళ్లి త‌దిత‌ర స‌న్నివేశాల‌తో సినిమా అస‌లు క‌థ‌లోకి వెళ్లడానికి చాలా స‌మ‌యం తీసుకుంటుంది.

రాహుల్ రామ‌కృష్ణ ఎపిసోడ్ త‌ర్వాతే క‌థలో సీరియ‌స్‌నెస్ క‌నిపిస్తుంది. ద్వితీయార్ధంలో అస‌లు నిందితుల్ని ఎలా బ‌య‌టికి తీసుకొచ్చాడు? ఆ స‌న్నివేశాలు ఎంత ఆస‌క్తిక‌రంగా ఉన్నాయ‌న్నదే సినిమాకి కీల‌కం. ఆ విష‌యంలో ద‌ర్శకుడు అక్కడక్కడా త‌న ప్రభావం చూపించారు కానీ, అవి సినిమాకి స‌రిపోలేదు. సినిమాలో సంభాష‌ణ‌లు ఎక్కువ‌గా వినిపిస్తాయే త‌ప్ప‌, క‌థ క‌థ‌నాలు మాత్రం ఎంత‌కీ ముందుకు సాగుతున్నట్టు అనిపించ‌దు. ప్రీ క్లైమాక్స్‌, క్లైమాక్స్ స‌న్నివేశాలు మెప్పిస్తాయి. క‌థ‌ని ముగించిన తీరు దీనికి సీక్వెల్ కూడా ఉంద‌నే సంకేతాల్ని పంపుతుంది. ర‌వితేజ, వేణు త‌ప్ప మిగ‌తా ఎవ్వరికీ ఇందులో బ‌ల‌మైన పాత్రలు లేవు. ప‌క్కా మాస్ క‌థ‌ల్లోలాగా కాకుండా ఇందులో రవితేజ ఒక ప్రభుత్వాధికారి కావ‌డంతో అందుకు త‌గ్గట్టుగానే క‌నిపించాల్సి వ‌చ్చింది.

క‌థానాయిక ర‌జీషా విజ‌య‌న్‌, దివ్యాంశ కౌశిక్ పెద్దగా ప్రాధాన్యం లేని పాత్రల్లో క‌నిపిస్తారు. న‌రేశ్‌, నాజ‌ర్‌, రాహుల్ రామ‌కృష్ణ, ప‌విత్ర లోకేశ్‌, పృథ్వీ, శ్రీ, అర‌వింద్ కృష్ణ‌… ఇలా ప‌లువురు న‌టులు క‌నిపించినా ఏ పాత్ర కూడా గుర్తుండిపోయేలా ఉండ‌దు. స‌త్యన్ సూర్యన్ కెమెరా ప్రభావం చూపించింది. స్వత‌హాగా ర‌చ‌యిత అయిన ద‌ర్శకుడు శరత్‌ మండ‌వ ఎక్కువ సంభాష‌ణ‌లైతే రాసుకున్నారు కానీ, క‌థ‌ని న‌డిపిన విధానం మాత్రం మెప్పించ‌దు. నిర్మాణం బాగుంది. శామ్ సీఎస్ సంగీతం, నేపథ్యం సంగీతం ఓకే అనిపిస్తాయి. సంతోష్ కెమెరా పనితనం ఆకట్టుకుంటుంది. 90వ దశకాన్ని చూస్తున్నట్టుగా ఎక్కడా కూడా అనిపించదు. ఇక క్యాస్టూమ్స్ అయితే నాటి కాలంలోవేనా? అని అనుమానం కలుగుతుంది. ఎడిటింగ్ విభాగం ఎన్నో సీన్లకు కత్తెర వేయాల్సిందనిపిస్తుంది. మాటలు కొన్ని చోట్ల పేలినట్టు అనిపిస్తాయి. ఇక నిర్మాణ విలువలు సినిమా స్థాయికి తగ్గట్టుగా ఉన్నాయి.

శ్రావణ శుక్రవారం నాడు మహాలక్ష్మిని ఇలా పూజించండి!

Tags :

Category : Behind the Scenes Features Sliders Spiritual

నేటితో శ్రావణమాసం ప్రారంభమైంది. తొలిరోజే శుక్రవారం రావడాన్ని హిందువులు ఎంతో ప్రాశస్త్యంగా భావిస్తున్నారు. దీంతో లక్ష్మీదేవి ఆలయాలన్నీ కిటకిటలాడుతున్నాయి. శ్రావణ మాసంలో అమ్మవారిని పూజిస్తే కష్టాలు తొలిగి సుఖశాంతులతో వర్ధిల్లుతారని పురాణాలు చెబుతున్నాయి.

శ్రావణ శుక్రవారం నాడు మహాలక్ష్మీని పూజించడం ద్వారా దీర్ఘసుమంగళీ ప్రాప్తం చేకూరుతుంది. శ్రావణ మాసంలో వచ్చే రెండో శుక్రవారం రోజున లేదా ప్రతి శుక్రవారం నాడు మహిళలు నిష్ఠతో మహాలక్ష్మిని పూజిస్తే సిరిసంపదలు వెల్లివిరుస్తాయని విశ్వాసం. ముఖ్యంగా శ్రావణ రెండో శుక్రవారం మహిళలు వరలక్ష్మి వ్రతాన్ని అత్యంత భక్తి శ్రద్ధలతో జరుపుకుంటారు. పెళ్ళైన తర్వాత వచ్చే తొలి శ్రావణంలో నవ వధువులతో తప్పనిసరిగా ఈ వ్రతం చేయిస్తారు. ఈ వ్రతం చేయడం వల్ల భర్త ఆరోగ్యం, ఆయుష్యు బాగుంటుందని మహిళల విశ్వాసం. వ్రతం చేసిన ముత్తైదువులు తోటి ముత్తైదువులకు పూర్ణాలు, గారెలతో వాయినాలిచ్చి ఆశీస్సులు తీసుకుంటారు. మహాలక్ష్మి విగ్రహాన్ని అందంగా అలంకరణ చేసి పేరంటాలను పిలిచి తాంబూళం, శెనగలు ఇస్తారు. ప్రతి ముత్తైదువును మహాలక్ష్మి రూపంగా తలిచి గౌరవిస్తారు.

శ్రావణ మాసంలో గోవులు, తామరపుష్పాలు, పాడిపంటలు, ఏనుగులు, అద్దాలు, శంఖనాదం, ఘంటారావం, హరిహరార్చన, పూజామందిరం, సర్వదేవతలనూ అర్చించే వారి స్వరం, తులసి ఉన్న ప్రదేశం, పువ్వులు, పండ్లతోటలు, మంగళకరమైన వస్తువులు, మంగళవాద్యాలు, దీపకాంతులు, కర్పూర హారతి, చెట్లలోని హరిత వర్ణం, స్నేహం, ఆరోగ్యం, ధర్మబుద్ధి, న్యాయస్థానాలు, శుచి, శుభ్రత, సదాచార పరాయణత, సౌమ్యగుణం, స్త్రీలు ఎటువంటి చీకూచింతా లేకుండా హాయిగా ఉండే ఇళ్లు, బ్రాహ్మణులు, విద్వాంసులు, పెద్దలు, పండితులకు సన్మాన సత్కారాలు జరిగే ప్రదేశాలు, వేదఘోష, సత్వగుణ సంపదలు, క్రమశిక్షణ, కార్యశూరత్వం, సమయపాలనలోనూ మహాలక్ష్మీ దేవి నివసిస్తుంది.

అందుచేత శ్రావణ శుక్రవారం పూట తులసీపూజ, ఆలయాల్లో పాలు, తేనెతో అభిషేకాలు చేయించే వారికి అనుకున్న కార్యాలు దిగ్విజయంగా పూర్తవుతాయి. శ్రావణ శుక్రవారం పూట సూర్యోదయానికి ముందే లేచి, శుచిగా స్నానమాచరించి, ఇంటిని, పూజగది శుభ్రం చేసుకోవాలి. గడప, పూజగదిని పసుపు, కుంకుమలు, పుష్పాలతో అలంకరించుకోవాలి. అనంతరం అమ్మవారి ప్రతిమ లేదా పటానికి కర్పూర హారతులు సమర్పించి, చక్కెర పొంగలిని నైవేద్యంగా పెట్టాలి. పూజా సమయంలో లక్ష్మీ అష్టోత్తర శతనామావళి, దుర్గాష్టకం లేదా అమ్మవారి శ్లోకములతో స్తుతించాలి. ఇంకా శ్రావణ మాసంలో వచ్చే శుక్రవారాల్లో ఉపవాసముండి, అమ్మవారిని ప్రార్థించే వారికి దీర్ఘసుమంగళి ప్రాప్తంతో పాటు సిరిసంపదలు వెల్లివిరుస్తాయి. శ్రావణ మాసంలో ప్రతి శుక్రవారం మహాలక్ష్మీ లేదా అమ్మవారిని ఆలయాల్లో దర్శించుకునే వారికి పుణ్యఫలితాలు చేకూరుతాయని విశ్వాసం. అంతేగాకుండా.. మల్లెపువ్వులు, కస్తూరి, జాజిపువ్వులను అమ్మవారికి సమర్పించి నేతితో దీపం వెలిగించే వారికి ఈతిబాధలు తొలగిపోయి, అనుకున్న కార్యాలు నెరవేరుతాయి.

ఆగస్టు 5న వస్తున్న ‘బింబిసార’.. రన్ టైమ్ ఎంతంటే

Tags :

Category : Behind the Scenes Daily Updates Movie News Sliders

నందమూరి కళ్యాణ్ రామ్ (Nandamuri Kalyan Ram) హీరోగా నటిస్తున్న లేటెస్ట్ పాన్ ఇండియా సినిమా ‘బింబిసార’ (Bimbisara). ఈ సినిమా రన్ టైం లాక్ అయినట్టు తెలుస్తోంది. 2020లో వచ్చిన ఎంత మంచివాడవురా తర్వాత కాస్త గ్యాప్ తీసుకున్న కళ్యాణ్ రామ్, ఇప్పుడు బింబిసార సినిమాతో రాబోతున్నాడు. యువ దర్శకుడు మల్లిడి వశిష్ట్ (Mallidi Vasisht) తొలిసారిగా మెగా ఫోన్ పట్టి తెరకెక్కిస్తున్న ఈ సోషియో ఫాంటసీ మూవీలో క్యాథరీన్ థ్రెసా (Catherine Tresa), సంయుక్తా మీనన్ (Samyuktha Menon), వరీన హుస్సేన్ (Warina Hussain) హీరోయిన్స్‌గా నటించారు.

ఆగష్టు 5న ఈ సినిమాను ప్రపంచవ్యాప్తంగా విడుదల చేయనున్నారు. ఈ నేపథ్యంలో ప్రమోషన్స్ జోరుగా సాగుతున్నాయి. ఇక ఈ నెల 29న గ్రాండ్‌గా ప్రీ రిలీజ్ ఈవెంట్‌ను నిర్వహించబోతున్నారు. ఈ గ్రాండ్ ఈవెంట్‌కి నందమూరి కళ్యాణ్ రామ్ సోదరుడు పాన్ ఇండియన్ స్టార్ యంగ్ టైగర్ ఎన్.టి.ఆర్ చీఫ్ గెస్ట్‌గా రాబోతున్నట్టు చిత్ర బృందం ఇప్పటికే అధికారికంగా ప్రకటిస్తూ సోషల్ మీడియా ద్వారా ఓ వీడియోను వదిలారు. అయితే, తాజా సమాచారం మేరకు బింబిసార సినిమా రన్ టైం ని మేకర్స్ లాక్ చేశారట. మొత్తం రన్ టైం 2గంటల 26 నిముషాలకు ఫైనల్ చేశారట. సెన్సార్ పూర్తైన తర్వాత ఈ విషయంలో కన్‌ఫర్మేషన్ రానున్నట్టు సమాచారం. కాగా, ఎన్టీఆర్ ఆర్ట్స్ (NTR Arts) పతాకంపై కె. హరికృష్ణ ఈ చిత్రాన్ని అత్యంత ప్రతిష్టాత్మకంగా, హై టెక్నీకల్ వాల్యూస్ తో నిర్మిస్తున్నారు. త్రిగర్తల రాజ్య ప్రభువు అయిన బింబిసారుడుగా కళ్యాణ్ రామ్ ఈ సినిమాలో కనిపించనున్నాడు. చిరంతన్ భట్ మ్యూజిక్, ఎం ఎం కీరవాణి బ్యాక్ గ్రౌండ్ మ్యూజిక్ అందిస్తున్నారు.

సినిమాలపై ప్రేక్షకులకు విరక్తి కలిగింది.. అశ్వనీదత్ షాకింగ్ కామెంట్స్

Tags :

Category : Behind the Scenes Daily Updates Movie News Sliders

సినిమాలపై ప్రేక్షకుల్లో విరక్తి కలిగిందని, వారిని థియేటర్‌కు రప్పించడం సవాలుగా మారిందని ప్రముఖ నిర్మాత అశ్వినీదత్‌ (Ashwini Dutt) అన్నారు. సీఎంల వద్దకు వెళ్లి టికెట్‌ ధరలు పెంచుకోవడమే ప్రస్తుత స్థితికి కారణమని అభిప్రాయపడ్డారు. వైజయంతి మూవీస్‌ బ్యానర్‌పై ఆయన నిర్మించిన తాజా చిత్రం ‘సీతారామం’. హను రాఘవపూడి దర్శకుడు. దుల్కర్‌ సల్మాన్‌, మృణాల్‌ ఠాకూర్‌, రష్మిక, సుమంత్‌ కీలక పాత్రల్లో నటిస్తున్నారు. ఆగస్టు 5న ఈ సినిమా ప్రేక్షకుల ముందుకు రానుంది. ఈ సందర్భంగా గురువారం అశ్వినీదత్‌ విలేకరులతో మాట్లాడుతూ.. చిత్ర పరిశ్రమపై సంచలన వ్యాఖ్యలు చేశారు.

‘‘నిర్మాతల శ్రేయస్సు కోసమే అప్పట్లో ప్రొడ్యూసర్స్‌ కౌన్సిల్‌ ఏర్పాటైంది. ప్రస్తుతం ప్రొడ్యూసర్స్‌ గిల్డ్‌ ఎందుకు వచ్చిందో తెలియట్లేదు. ధరలు తగ్గించాలని ఓసారి.. పెంచాలని మరోసారి చెప్పడం వల్లే సినిమాపై ప్రేక్షకుల్లో విరక్తి కలిగింది. టికెట్‌ ధరలు పెంచిన వాళ్లే ఇప్పుడు ‘షూటింగ్స్‌ బంద్‌’ అని ఆందోళన చేస్తున్నారు. కరోనాతో పాటు టికెట్ల ధరలను పెంచడం, తగ్గించడం, సినిమాలకు వ్యయం ఎక్కువయ్యిందని సీఎంలతో ధరలను పెంచుకున్నారు. ధరలు పెంచకముందే ఒక సెక్షన్‌ ప్రజలు థియేటర్‌కు రావడం లేదు. సినిమాహాల్‌ క్యాంటీన్‌లలో ఎనలేని రేట్లు పెట్టారు. ఫ్యామిలీతో సినిమా రావాలంటేనే విరక్తి పుట్టేలా చేశారు. ఈ లోపు ఓటీటీలు వచ్చాయి. ఓటీటీలపై దండయాత్ర చేస్తున్నారు. కానీ, థియేటర్‌కు జనం రాకుండా ఓటీటీలో సినిమాలు విడుదల చేయకపోతే సినిమాలు చేయడం కష్టం. ఇష్టారీతిన హీరోలకు పారితోషికాలు ఇస్తున్నారనడం సరికాదు. మార్కెట్‌ ధర ప్రకారమే హీరోలు పారితోషికాలు తీసుకుంటారు. హీరోల పారితోషికాల వల్లే టికెట్‌ ధరలు పెంచారనేది అవాస్తవం. గతంలో సమస్యలొస్తే ఎన్టీఆర్‌, నాగేశ్వరరావు వంటి హీరోలు రాలేదు. సమస్యలుంటే ఫిల్మ్‌ ఛాంబరే పరిష్కరించేది. ప్రస్తుత నిర్మాతల్లో స్థిరత్వం లేదు’’ అంటూ ఘాటు వ్యాఖ్యలు చేశారు.

ప్రభాస్‌ కథానాయకుడిగా నాగ్‌ అశ్విన్‌ తెరకెక్కిస్తున్న ‘ప్రాజెక్ట్‌ కె’ విడుదలపై కూడా అశ్వినీదత్‌ స్పందించారు. ఈ చిత్రాన్ని వచ్చే ఏడాది అక్టోబరు 18న ప్రేక్షకుల ముందుకు తీసుకురానున్నట్టు తెలిపారు. ఒకవేళ అప్పుడు కుదరకపోతే 2024 సంక్రాంతి కానుకగా విడుదల చేసే ఆలోచన ఉందని పేర్కొన్నారు. వచ్చే ఏడాది జనవరితో చిత్రీకరణ పూర్తయ్యే అవకాశం ఉందని, గ్రాఫిక్స్‌ పనులకు ఎక్కువ సమయం పడుతుందన్నారు. అవెంజర్స్‌ మూవీ స్థాయిలో ‘ప్రాజెక్ట్‌ కె’ ఉంటుందని అశ్వినీదత్‌ చెప్పారు.

‘విక్రాంత్ రోణ’ మూవీ రివ్యూ

Tags :

Category : Behind the Scenes Daily Updates Latest Reviews Movie Reviews Movie Reviews by Telugu Box Office Sliders


చిత్రం: విక్రాంత్ రోణ‌; న‌టీన‌టులు: కిచ్చా సుదీప్, నిరూప్ భండారి, నీతాఅశోక్, జాక్వెలిన్ ఫెర్నాండేజ్‌, ర‌విశంక‌ర్ గౌడ‌, మ‌ధుసూద‌న‌రావు త‌దిత‌రులు; సంగీతం: అజ‌నీష్ లోక‌నాథ్; కూర్పు: ఆశిక్ కుసుగొల్లి; ఛాయాగ్రహ‌ణం: విలియం డేవిడ్‌; క‌ళ‌: శివ‌కుమార్‌; ద‌ర్శక‌త్వం: అనూప్ భండారి; నిర్మాతలు: జాక్ మంజునాథ్‌, అలంకార్ పాండియ‌న్‌; విడుద‌ల తేదీ: 28-07-2022

కేజీయఫ్ తరువాత కన్నడ పరిశ్రమ మీద అందరి దృష్టి పడింది. మళ్లీ పాన్ ఇండియన్ స్థాయిలో కన్నడ సత్తా చాటాలని అక్కడి మేకర్లు, హీరోలు ప్రయత్నిస్తున్నారు. కానీ కేజీయఫ్ మేనియాను బీట్ చేయలేకపోతోన్నాయి. ఇక ఇప్పుడు కిచ్చా సుదీప్ విక్రాంత్ రోణ అంటూ నేడు (జూలై 28) వచ్చాడు. మరి ఈ చిత్రం ఆడియెన్స్‌ను ఏ మేరకు మెప్పించిందో ఓ సారి చూద్దాం.

కొమ‌ర‌ట్టు అనే ఊరిలో జ‌రిగే క‌థ ఇది. ఆ ఊరిలో ఓ పాడుబ‌డ్డ ఇల్లు. ఆ ఇంట్లో ఓ బ్రహ్మరాక్షసుడు ఉంటున్నాడన్నది ఊరి ప్రజ‌ల న‌మ్మకం. ఆ ఇంటి ఆవ‌ర‌ణ‌లో ఉన్న బావిలో ఒక శ‌వం దొరుకుతుంది. అది ఆ ఊరి ఇన్‌స్పెక్టర్ శ‌వం. దానికి త‌ల ఉండ‌దు. ఈ హ‌త్యకు పాల్పడిన నేర‌స్థుల్ని ప‌ట్టుకోవ‌డం కోసం కొత్తగా వ‌చ్చిన ఇన్‌స్పెక్టర్‌ విక్రాంత్ రోణ (Sudeep) ఇన్వెస్టిగేష‌న్ మొద‌లుపెడ‌తాడు. ఈ క్రమంలో ఆ ఊరిలో అప్పటికే ప‌దుల సంఖ్యలో పిల్లలు హ‌త్యకు గురైన‌ట్లు తెలుసుకుంటాడు. మ‌రి వాళ్ల మ‌ర‌ణాల‌కు.. పోలీస్ హ‌త్యకు ఉన్న లింకేంటి? కొత్తగా ఊరికొచ్చిన సంజు (నిరూప్ భండారి) ఎవ‌రు? ఈ కేసుకు విక్రాంత్ వ్యక్తిగ‌త జీవితానికి ఉన్న లింకేంటి? అస‌లు ఆ ఊరిలో ఉన్న ఆ బ్రహ్మరాక్షసుడు ఎవ‌రు? అన్నది తెర‌పై చూడాల్సిందే.

విక్రాంత్ రోణ పాత్రలో కిచ్చా సుదీప్ మెప్పించాడు. అడ్వెంచర్లు, యాక్షన్ సీక్వెన్స్‌లో కిచ్చా సుదీప్ అందరినీ మెప్పిస్తాడు. సంజుగా నటించిన నిరూప్ భండారి పాత్ర చివరకు ఊహించినట్టే ముగుస్తుంది. ఆ కారెక్టర్‌లో నిరూప్ బాగానే నటించాడు. అపర్ణగా కనిపించిన నీతా అశోక్ పర్వాలేదనిపిస్తుంది. ఫక్రుగా కార్తీక్ రావు అంతో ఇంతో నవ్వించే ప్రయత్నం చేశాడు. ఇక ఇందులో పాత్రలు ఎక్కువగా ఉండటంతో.. అందరికీ సరైన ప్రాధాన్యం కల్పించినట్టు అనిపించదు. కానీ వారంతా కనిపించిన ప్రతీసారి మెప్పించేస్తారు.

ఇదొక యాక్షన్ అడ్వెంచర్‌ ఫాంటసీ థ్రిల్లర్‌. ఈ క‌థ చెప్పడం కోసం ద‌ర్శకుడు సృష్టించుకున్న ఊరు.. దాన్ని అందంగా చూపించిన విధానం ప్రేక్షకులకు కొత్త అనుభూతిని పంచుతుంది. ఓ త‌ల్లి త‌న కూతురుతో క‌లిసి కొమ‌ర‌ట్టుకు రావ‌డం.. దారిలో ఊహించ‌ని ప్రమాదం ఎదుర‌వ‌డం.. ఓ ముసుగు రూపం వారిపై దాడిచేయ‌డం.. ఇలా ఉత్కంఠ‌భ‌రితంగా సాగే స‌న్నివేశాల‌తో సినిమా ఆస‌క్తిక‌రంగా ప్రారంభ‌మ‌వుతుంది. అక్కడి నుంచే అస‌లు ఆ ఊరిలో ఏం జ‌రుగుతోందా అని తెలుసుకోవాల‌న్న ఆస‌క్తి ప్రేక్షకుల్లోనూ మొద‌ల‌వుతుంది. కిచ్చా సుదీప్ ప‌రిచ‌య స‌న్నివేశాలు.. ఈ క్రమంలో వ‌చ్చే యాక్షన్ ఎపిసోడ్ చాలా స్టైలిష్‌గా ఉంటాయి. మ‌ధ్యలో సంజు కుటుంబ నేప‌థ్యంలో వ‌చ్చే స‌న్నివేశాలు మ‌రీ మెలోడ్రామాలా సాగుతున్నట్లు అనిపిస్తాయి. విక్రాంత్ ఇన్‌స్పెక్టర్ హ‌త్య కేసు గురించి ఇన్వెస్టిగేష‌న్ మొద‌లు పెట్టాకే కథ‌లో వేగం పెరుగుతుంది.

అయితే, థ్రిల్లర్ క‌థల్లో ర‌హ‌స్యాన్ని ఛేదించే క్రమం ఆస‌క్తిక‌రంగా సాగుతున్నప్పుడే ప్రేక్షకులు క‌థ‌తో క‌నెక్ట్ అవ్వగలుగుతారు. అయితే దీన్ని జాగ్రత్తగా తీర్చిదిద్దుకోవ‌డంలో ద‌ర్శకుడు త‌డ‌బ‌డ్డాడు. దీనికి తోడు సంజు ల‌వ్‌ ట్రాక్‌, జ‌నార్ధన్‌ గంభీర్ (మ‌ధుసూధ‌న్ రావు) స్మగ్లింగ్ ఎపిసోడ్ ప్రేక్షకుల్ని గంద‌ర‌గోళానికి గురిచేస్తాయి. మ‌ధ్య మ‌ధ్యలో వచ్చే కొన్ని భయంకరమైన ఎపిసోడ్‌లు ప్రేక్షకుల్లో ఉత్కంఠ‌త రేకెత్తిస్తాయి. విరామానికి ముందొచ్చే ఎపిసోడ్ థ్రిల్లింగ్‌గా అనిపిస్తుంది. ఇక ద్వితీయార్ధమంతా రొటీన్ రివెంజ్‌ డ్రామాలా సాగుతుంది. హ‌త్యల‌కు పాల్పడుతున్న నేర‌స్థుడి ప్లాష్‌బ్యాక్‌లో బ‌ల‌మైన సంఘ‌ర్షణ క‌నిపించదు. ప‌తాక స‌న్నివేశాల్లో క‌నిపించే విజువ‌ల్స్.. సుదీప్ గ‌తానికి సంబంధించిన స‌న్నివేశాలు ఆక‌ట్టుకుంటాయి. అయితే, సినిమాని ముగించిన తీరు అంత‌గా మెప్పించ‌దు.

Search

Latest Updates

© Copyright 2020. All Rights Reserved