Telugu cinema news, Telugu Movies Updates, Latest Movie reviews in Telugu, Telugu cinema reviews, telugu movie reviews, Tollywood, Box office collections, Telugu Movie show times, Theater List, telugu cinema tickets
హోమానికి హిందూమతంలో విశేష ప్రాధాన్యత ఉంది. దీనికి వేల సంవత్సరాల చరిత్ర ఉంది. ప్రతికూల శక్తిని తగ్గించుకోవడానికి గ్రహశాంతితో సహా అనేక పుణ్యాల ప్రాప్తి కోసం హోమాలు నిర్వహిస్తారు. హోమంలో మనం సమర్పించే వస్తువులు, కోరికలు అగ్నిదేవుడు నేరుగా దేవునికి అందజేస్తాడని నమ్మకం. హోమంలో చాలా రకాలు ఉన్నాయి, హోమం చేయడం వల్ల ఏ ఫలితం లభిస్తుంది. ఇప్పుడు తెలుసుకుందాం.
గణపతి హోమం విఘ్నాలను తొలగించే విఘ్న నాయకుడు గణపతి. మానవులు ప్రారంభించే ప్రతి కార్యాల్లోనూ మొదటగా గణపతిని పూజించడం జరుగుతుంది. ప్రారంభించిన కార్యం ఎటువంటి ఆటంకాలు లేకుండా పూర్తి కావాలని కోరుతూ వినాయకుడిని పూజిస్తారు. జీవితంలో ఎదురయ్యే కష్టాలను, ప్రతికూల అంశాలను తొలగించడానికి వినాయకుడికి గణపతి హోమం నిర్వహిస్తాం. ఈ గణపతి హోమం చేయడం వలన విజయము, ఆరోగ్యము, సంపద కార్య సిద్ధి కలుగుతాయి. హిందూ ధర్మం ప్రకారం ఏ శుభకార్యం చేయాలన్నా మొదటగా గణపతి హోమంతోనే ప్రారంభించడం జరుగుతుంది.
రుద్ర హోమం పురాణ కథలను అనుసరించి రుద్ర అనునది శివునికి మరొక నామము. శివుడు లేదా రుద్రుని అనుగ్రహం కొరకు చేసే హోమాన్ని రుద్ర హోమము అంటారు. ఈ హోమం చేయుట వలన శివుని అనుగ్రహం పొంది తద్వారా అపమృత్యు భయాలు తొలగింపబడి, దీర్ఘకాలిక అనారోగ్య సమస్యల నుండి విముక్తి పొంది శక్తి సంపన్నులు అవుతారు. దీర్ఘాయుష్షుని పొందడం జరుగుతుంది. మృత్యువు మీద విజయాన్ని సాధించడానికి కూడా ఈ రుద్ర హోమం చేస్తారు. ఏ వ్యక్తి అయితే రుద్ర హోమం చేయాలనుకుంటే వారి జన్మ నక్షత్రం ఆధారంగా నిర్ణయించబడిన ముహూర్తానికి నిర్వహిస్తుంటారు. ఈ రుద్రహోమం అత్యంత శక్తివంతమైనది.
చండీ హోమం హిందూ పురాణాల ప్రకారం అత్యంత శక్తిస్వరూపిణి చండీ. జీవితంలో ఎదురయ్యే కష్టాలను తొలగించడానికి, ఆనందమైన జీవితాన్ని గడపడానికి, సిరిసంపదల కోసం చండి హోమం నిర్వహించడం జరుగుతుంది. చండి హోమం నిర్వహించడం వలన జీవితంలో ఉన్న ప్రతికూల అంశాలన్నీ తొలగిపోతాయి. చండీ హోమం చేసేప్పుడు నవగ్రహాలను ఆవాహన చేసుకొని చేయడం జరుగుతుంది. చండీ హోమాన్ని ఎక్కువగా శుక్రవారం రోజు లేదా అష్టమి, నవమి తిథుల్లో చేయడం శ్రేష్టం. సప్తశతిలో ఉన్నటువంటి 13 అధ్యాయాల ప్రకారంగా చండీహోమం చేసేందుకు 13 రకాల విభిన్నమైన పదార్థాలను వాడడం జరుగుతుంది.
గరుడ హోమం మానవుని శరీరాకృతి, గరుడి ముఖము కలిగి శ్రీమహావిష్ణువు వాహనంగా పిలువబడే దైవ స్వరూపమే గరుడుడు. గరుడుడు అనంతమైన శక్తికి, జ్ఞానానికి స్వరూపం. గరుడార్, గరుడ భగవాన్ అని పిలిచుకొనే గరుడుడికి చేసే హోమమే గరుడ హోమం. సరైన విధివిధానాలతో కనుక గరుడ హోమం చేసినట్లయితే ఆకర్షణ శక్తి పెరగడం అలాగే అనేక విషయాల పట్ల, వ్యక్తుల పట్ల ఆధిపత్యాన్ని సాధించడం, శత్రువుల మీద విజయం, ప్రమాదాల నుంచి రక్షించబడడం, అన్ని శారీరక, మానసిక వ్యాధుల నుంచి ఉపశమనం మొదలగునవి లభిస్తాయి. అంతేకాకుండా ఈ గరుడ హోమం చేయడం వలన జ్ఞానము అలాగే జ్ఞాపకశక్తి వృద్ధి జరుగుతుంది.
సుదర్శన హోమం శ్రీ మహావిష్ణుకు చెందిన అత్యంత శక్తివంతమైన ఆయుధమే సుదర్శన చక్రం. హిందూ పురాణాల ప్రకారం ఈ ఆయుధం చాలా శక్తివంతమైన ఆయుధమే కాకుండా దైవిక శక్తి కలిగి ఉండి దుష్టశక్తులను సంహరిస్తుంది. మానవుని జీవితంలో లేదా కుటుంబంలో జరుగుతున్న ప్రతికూల అంశాలకు కారణమైన దుష్టశక్తుల నుండి రక్షింపబడడానికి, నరదృష్టి తొలగించడానికి ఈ సుదర్శన హోమం చేస్తుంటారు. ముఖ్యంగా గృహ ప్రవేశం, ఇతర శుభకార్యాల సమయంలో కూడా సుదర్శన హోమం నిర్వహించబడుతుంది. హోమాగ్నికి అష్ట ద్రవ్యాలను సమర్పిస్తూ అత్యంత పవిత్రమైన సుదర్శన మంత్రాన్ని జపిస్తూ ఈ హోమం చేయడం జరుగుతుంది. మానవుని జన్మ నక్షత్రం ఆధారంగా నిర్ణయింపబడిన ముహూర్తాన్ని అనుసరించి ఈ హోమం చేస్తారు.
మన్యుసూక్త హోమం వేదాలను అనుసరించి మాన్యు అనగా ఆగ్రహం అని, లేదా మరొక అర్థంలో తీవ్రమైన భావావేశము అని చెప్పబడుతుంది. మాన్యు దేవుడి ఆశీస్సుల కోసం చేసే హోమం మన్యుసూక్త పాశుపత హోమం. ఈ హోమాన్ని ప్రధానంగా శత్రు సంహారం కోసం చేయడం జరుగుతుంది. కోర్టు కేసుల లాంటి దీర్ఘకాలిక సమస్యల నుండి విముక్తి కోసం కూడా ఈ హోమాన్ని చేస్తారు. ఈ హోమాన్ని శనివారం చేయడం ద్వారా ఉత్తమమైన ఫలితాలు పొందవచ్చు.
లక్ష్మీ కుబేర పాశుపత హోమం హిందూ ధర్మానుసారంగా… సంపదకి దేవతలుగా లక్ష్మీ దేవిని, కుబేరుడిని పూజిస్తాం. జీవితంలో ఆర్థికంగా కష్టాలను ఎదుర్కొంటున్న వారికోసం సూచింపబడేదే లక్ష్మి కుబేర పాశుపతహోమం. జీవితంలో ఆర్థిక వృద్ధి, సిరి సంపదల కొరకు లక్ష్మీదేవిని అలాగే కుబేరుడిని కూడా ఈ హోమంలో పూజించడం జరుగుతుంది. ప్రధానంగా ఈ హోమాన్ని శుక్రవారం రోజున చేయడం శ్రేష్టం. హోమం చేసుకునే వ్యక్తి యొక్క జన్మ నక్షత్రాన్ని అనుసరించి నిర్ణయించబడిన ముహూర్తానికి ఈ హోమం చేస్తారు. ఈ హోమంలో కమలం పువ్వులను వినియోగిస్తారు.
మృత్యుంజయ పాశుపత హోమం మరణం నుంచి విజయాన్ని పొందడమే మృత్యుంజయం. పేరులో ఉన్నట్టుగానే మృత్యువుపైన విజయాన్ని సాధించడం కోసం మృత్యుంజయ పాశుపత హోమం నిర్వహిస్తారు. ప్రాణహాని అలాగే తీవ్రమైన అనారోగ్య సమస్యల నుండి విముక్తి పొందడం కోసం ఈ హోమం చేస్తారు. దుష్టశక్తులను అదుపుచేసి, సంహరించే భూత నాథుడిగా పిలవబడే ఆ శివుడిని ప్రసన్నం చేసుకోవడం కోసం చేసే హోమం చేస్తారు. ఈ హోమం చేసుకునేవారు ఒక్కో మంత్రాన్ని 21సార్లు జపించవలసి ఉంటుంది. ఈ హోమం చేయడానికి కావాల్సిన ప్రధాన వస్తువులు. దర్భ, అమృత మూలిక. దీర్ఘాయుష్షును కోరుతూ హోమము చేసే వారి జన్మదినం రోజున ఈ హోమాన్ని నిర్వహిస్తారు.
నవదుర్గ పాశుపత హోమం
భక్తుల చేత దుర్గామాత నవదుర్గగా పూజింప బడుతుంది. జట దుర్గ, శాంతి దుర్గ, శూలిని దుర్గ, శబరి దుర్గ, లవణ దుర్గ, అసురి దుర్గ, దీప దుర్గా, వన దుర్గ, మరియు జ్వాలా దుర్గ. దుర్గా మాత యొక్క ఈ తొమ్మిది రూపాలను పూజించడానికి చేసే హోమమే ఈ నవదుర్గ పాశుపత హోమం.ఈ హోమం చేయడం వలన దుష్ట శక్తుల నుంచి విముక్తి, శాంతి, సంపద, ఆరోగ్యం, ఆయుష్యు, సంతానం, విద్య మొదలైనవి లభించి ప్రతికూలమైన ఆలోచనలు, ప్రతికూలమైన అంశాలను నుండి విముక్తి కలుగుతుంది.
యజ్ఞం, హోమం లేదా యాగం ఒక విశిష్టమైన హిందూ సంప్రదాయం. భారతదేశంలో పురాణకాలం నుంచి వివిధ రకాలెన యజ్ఞాలు, హోమాలు జరిగాయి. దేవతలకు తృప్తి కలిగించడమే వీటి లక్ష్యం. ఇలాంటి హోమాల్లో చండీ హోమం ముఖ్యమైనది. చండీ మాత ఓ ప్రచండ శక్తి. భూగ్రహంపై మాత్రమే కాకుండా విశ్వాంతరాళాలని అంటిపెట్టుకునే ఉంటుంది. సృష్టి జరగడానికి, అది వృద్ధి చెందడానికి, తిరిగి లయం కావడానికి అవసరమైన శక్తి అంతా ఆమెలోనే ఉంది. ఆమె ఆదిశక్తి, పరాశక్తి, జ్ఞానశక్తి, ఇచ్చాశక్తి, క్రియాశక్తి, కుండలినీ శక్తి. అందుకే ఆమెకు అంత ప్రాధాన్యం. లోక రక్షకులైన అమ్మవారి స్వరూపాల్లో చండీ ఒకటి. లోక కల్యాణం కోసం, విశేష కార్యసిద్ధి కోసం సకల చరాచర జగత్తు సృష్టికి, స్థితికి, లయకు మూల కారణమైన జగన్మాతను ఆరాధించడం అనాదిగా వస్తోంది. ఆదితత్త్వాన్ని నేత్రమూర్తిగా భావించి చేసే ప్రకృతి ఉపాసనే శ్రీవిద్య.
చండీ లేదా దుర్గాదేవి విజయాలను వివరించడంతో పాటు బ్రహ్మాది దేవతలు ఆమె వైభవాన్ని కీర్తించే శక్తిమంతమైన మంత్రాల కదంబమే చండీ లేదా దుర్గా సప్తశతి. దుర్గ లేదా చండీ సప్తశతి మూడు చరిత్రలుగా, 13 అధ్యాయాలుగా ఉంటుంది. తొలి భాగంలో ఒకే ఒక అధ్యాయం ఉంటుంది. రెండో భాగంలో మూడు అధ్యాయాలు, మూడో భాగంలో తొమ్మిది అధ్యాయాలు ఉన్నాయి. చండీ హోమానికి సంబంధించి నవ చండీ యాగం, శత చండీ యాగం, సహస్ర చండీ యాగం, అయుత (పది వేలు) చండీ యాగం, నియుత (లక్ష) చండీ యాగం, ప్రయుత (పది లక్షలు) చండీ యాగం ఉంటాయి. ఎక్కడ చండీ ఆరాధనలు జరుగుతాయో అక్కడ దుర్భిక్షం ఉండదు. దుఃఖం అనేది రాదు. ఆ ప్రాంతంలో అకాల మరణాలు ఉండవు. లోక కల్యాణం, సర్వజనుల హితం కోసం పరబ్రహ్మ స్వరూపిణి అయిన చండికా పరమేశ్వరులను పూజించాలని సూత సంహిత ఉద్ఘాటిస్తోంది.
కలియుగంలో చండీ పారాయణకు మించిన శక్తిమంతమైన ఫలసాధనం మరొకటి లేదని శాస్త్రవచనం. ఇహపర సాధనకు చండీ హోమం ఉత్తమం. ఏడు వందల మంత్రాలతో కూడిన చండీ సప్తశతిని పారాయణ చేసి, హోమం నిర్వహించడమే చండీ హోమం. దేశోపద్రవాలు శాంతించడానికి, గ్రహాల అనుకూలతకు, భయభీతులు పోవడానికి, శత్రు సంహారానికి, శత్రువులపై విజయం సాధించడానికి తదితర కారణాలతో చండీ యాగం చేస్తారు. వీటిలో నవ చండీ యాగం చేస్తే వాజపేయం చేసినంత ఫలం వస్తుందట.
ఏకాదశ చండి చేస్తే రాజు వశమవుతాడని, ద్వాదశ చండి చేస్తే శత్రు నాశనమని, మను చండి (చతుర్దశ చండి)తో శత్రువు వశమవుతాడని మార్కండేయ పురాణం చెప్పినట్లు శాంతి కమలాకరంలో ఉంది. ఇక, శత చండి చేస్తే కష్టాలు, వైద్యానికి లొంగని అనారోగ్యం, ధన నష్టం తదితరాలు తొలగుతాయి. సహస్ర చండితో లక్ష్మీదేవి వరిస్తుంది. కోరికలు నెరవేరతాయి. లక్ష చండి చేస్తే చక్రవర్తి అవుతాడని మార్కండేయ పురాణంలో ఉంది. ప్రయుత చండి అంటే పది లక్షల చండీ సప్తశతి పారాయణాలు. ఇది చేసిన వారు ఆర్థిక,మానసిక, విద్య ,వైద్య లేక వివాహ సంతాన ఇలాంటి ఎన్నో బాధలకు విముక్తి పొందుతారు.
ఈతి బాధలు తొలగిపోవాలంటే ఎలాంటి పరిహారం చేసుకోవాలని చాలామంది అడుగుతుంటారు. ఆధ్యాత్మికతవేత్తలు, పండితులు, జ్యోతిష్యులు ఇచ్చిన సలహాలతో ఆ విధంగా కార్యాలు చేసి ఫలితం పొందుతుంటారు. అయితే ఒకే పరిహారం అన్ని రాశుల వారికి వర్తించదు. వారు జన్మనక్షత్రం, రాశి తదితరాల ఆధారంగా ఏయే రాశుల ఎలాంటి తాంబూలం ఇవ్వాలన్ని మన పురాణాల్లో పొందుపరిచారు. 12 రాశుల్లో జన్మించిన జాతకులు ఏయే దేవుళ్లకు తాంబూలం సమర్పించి ప్రార్థించాలో తెలుసుకుందాం…
మేష రాశి తాంబూలంలో మామిడి పండును ఉంచి మంగళవారంలో కుమారస్వామిని ప్రార్థిస్తే ఈతి బాధలు తొలగిపోతాయి.
వృషభ రాశి తమలపాకులో మిరియాలు ఉంచి మంగళవారం పూట రాహువును స్తుతిస్తే కష్టాలు తొలగి సుఖ సంతోషాలు చేకూరుతాయి.
మిథున రాశి తమలపాకులో అరటిపండును ఉంచి బుధవారం ఇష్టదేవతా పూజ చేస్తే అనుకున్న కార్యాలు సిద్ధిస్తాయి.
కర్కాటక రాశి తమలపాకులో దానిమ్మను ఉంచి శుక్రవారం పూట కాళిమాతను ప్రార్థిస్తే కష్టాలు తీరిపోతాయి.
సింహ రాశి తమలపాకులో అరటిపండును ఉంచి గురువారం ఇష్టదేవతా పూజను చేయాలి.
కన్యా రాశి తమలపాకులో మిరియాలు ఉంచి గురువారం ఇష్టదేవతా పూజ చేస్తే దుఃఖం దూరమవుతుంది.
తులా రాశి తమలపాకులో లవంగాన్ని ఉంచి శుక్రవారం పూట ఇష్టదేవతను స్తుతిస్తే అనుకున్న కార్యాలు సిద్ధిస్తాయి.
వృశ్చిక రాశి తమలపాకులో ఖర్జూర పండును ఉంచి మంగళవారం పూట ఇష్టదేవతను పూజిస్తే ఈతి బాధలు తొలగిపోతాయి.
ధనుస్సు రాశి తమలపాకులో కలకండను ఉంచి గురువారం పూట ఇష్టదేవతను పూజించినట్లైతే సుఖసంతోషాలు చేకూరుతాయి.
మకర రాశి తమలపాకులో బెల్లం ఉంచి శనివారం కాళిమాతను పూజిస్తే కష్టాలు తొలగిపోతాయి.
కుంభ రాశి తమలపాకులో నెయ్యిని ఉంచి శనివారం పూట కాళిమాతను పూజిస్తే దుఃఖాలు తొలగిపోతాయి.
మీన రాశి తమలపాకులో పంచదారను ఉంచి ఆదివారం ఇష్టదేవతను పూజించినట్లైతే సుఖసంతోషాలు చేకూరుతాయి.
నవరస నటనా సార్వభౌమ నందమూరి తారక రామారావు నట వారసుడిగా తెలుగు సినీ పరిశ్రమలోకి అడుగుపెట్టారు నందమూరి బాలకృష్ణ. బడా ఫ్యామిలీ బ్యాక్‌గ్రౌండ్‌తో వచ్చినా తనకంటూ ప్రత్యేక ఇమేజ్ సొంతం చేసుకుని సుదీర్ఘ కాలంగా హీరోగా కొనసాగుతున్నారు. తన పని అయిపోయిందంటూ విమర్శలు వచ్చిన ప్రతిసారి బ్లాక్‌బస్టర్ హిట్లతో క్రిటిక్స్ నోళ్లు మూయించడం బాలయ్యకు వెన్నతో పెట్టిన విద్య. అయితే కేవలం సినిమాలే కాకుండా ఆహాలో ప్రసారమైన ‘అన్స్టాపబుల్’ షోతో తనలో మరో యాంగిల్ ఉందని నిరూపించారు. బాలకృష్ణ హోస్ట్ చేసిన ఈ షో దేశంలోనే నంబర్‌వన్‌గా నిలవడం విశేషం. ఆ ఉత్సాహంతోనే ‘అన్స్టాపబుల్’ రెండో సీజన్‌కు రెడీ అయ్యారు. త్వరలోనే మొదలుకానున్న ఈ షోకు సంబంధించి అఫిషియల్ ట్రైలర్ తాజాగా విడుదలైంది. ఇందులో ‘దెబ్బకి థింకింగ్ మారిపోవాలి’ అంటూ పవర్‌ఫుల్‌ డైలాగ్‌తో బాలయ్య అలరించారు. ఇంకెందుకు ఆలస్యం ఈ ట్రైలర్‌ని మీరూ ఓ లుక్కేయండి…
టాకీలు మొదలైన కొత్తల్లో… అంటే 1935 నుంచి 1964 వరకు దాదాపు 29 సంవత్సరాలు చలనచిత్ర రంగంలో ఒక వెలుగు వెలిగిన అద్భుత నటీమణి పసుపులేటి కన్నాంబ. కన్నాంబ చిత్రరంగానికి వచ్చిన కొత్తల్లోనే మరొక అందాల నటి కాంచనమాల కూడా సినీరంగ ప్రవేశం చేసింది. కాంచనమాలకు దీటుగా కన్నాంబ సౌందర్యంలో ఆమెతో పోటీపడింది. అయితే రాశిలో కన్నాంబ చిత్రసీమలో వెలుగొందిన కాలం కాంచనమాల కన్నా ఎక్కువ. కాంచనమాల కేవలం పది సినిమాల్లో మాత్రమే నటించగా కన్నాంబ ఏకంగా 170 సినిమాల్లో నటించి రాణించింది. అప్పటి సినీరంగంలో కన్నాంబ అత్యంత ధనవంతురాలని పేరుంది. ఏడువారాల నగలతో ఇంట్లో ఎక్కడ చూసినా బంగారం కనిపిస్తూ వుండేది. నిలువెత్తు విగ్రహంతో, అద్భుతమైన, విస్పష్టమైన వాచకంతో, అంతే అద్భుతమైన నటనా పటిమతో అలరారిన నటీమణి కన్నాంబ. కరుణరసం ఉట్టిపడే పాత్రల్లో గాని, వీరరసం ఉప్పొంగే పాత్రల్లో గాని కన్నాంబ నటన వర్ణనాతీతంగా వుండేది. ఆమె కేవలం తెలుగు చిత్రసీమకు మాత్రమే పరిమితం కాలేదు. తెలుగు వాళ్లు ఎంతగా ఆమెను ఆదరించారో అంతే సమానంగా తమిళ ప్రేక్షకులు కూడా ఆదరించారు.
బాలతారగా నాటక రంగంలో… కన్నాంబ 5 అక్టోబర్‌ 1911న కడప పట్టణంలో జన్మించింది. ఆమె తండ్రి వెంకట నరసయ్య, తల్లి లోకాంబ. తండ్రి ప్రభుత్వ కాంట్రాక్టర్‌గా పనిచేస్తుండేవారు. వారికి కన్నాంబ ఒక్కటే కూతురు. కన్నాంబ ఎక్కువ కాలం వాళ్ల అమ్మమ్మ గారింట ఏలూరులోనే పెరిగింది. కన్నాంబ తాత నాదముని నాయుడు వైద్యవృత్తిలో వుండేవారు. కన్నాంబ చిన్నతనంలోనే సంగీతం మీద ఆసక్తి కనబరచడంతో తాతగారు ఆమెకు సంగీతంలో శిక్షణ ఇప్పించారు. తన 13వ ఏటనే కన్నాంబ నాటకాల్లో నటించడం ప్రారంభించింది. ఆమెకు పదహారు సంవత్సరాల వయసులో ఒక చిన్న సంఘటన జరిగింది. ఏలూరు పట్టణంలో సత్యహరిశ్చంద్ర నాటకం జరుగుతోంది. ఆ నాటకానికి కన్నాంబ కూడా వెళ్లింది. చంద్రమతి పాత్రధారి శోకరసంతో పాడాల్సిన పద్యాలను పాడలేకపోవడంతో ప్రేక్షకులు గేలి చేయడం మొదలెట్టారు. ప్రేక్షకుల మధ్య నుంచి కన్నాంబ లేచి రంగస్థలం మీదకు వెళ్లి చంద్రమతి పాత్రను తను పోషిస్తానని ప్రకటించి, వేగంగా ముఖానికి రంగుపూసుకొని వచ్చి పద్యాలు పాడుతూ వుంటే, ప్రేక్షకులు నిశ్చేష్టులై చూస్తూ వన్స్‌ మోర్లు కొట్టడం ఆరంభించారు. దాంతో కన్నాంబ నాటక ప్రస్థానం మొదలైంది. ఇదే నాటక సమాజం వారు కన్నాంబకు సావిత్రి, సత్యభామ, అనసూయ, చంద్రమతి వంటి మంచి మంచి పాత్రలు ఇచ్చి వారి నాటకాలను రక్తికట్టించే ప్రయత్నం చేశారు. కన్నాంబ సత్యవంతుడు, భక్త కబీరు వంటి మగ పాత్రలు పోషించడం కూడా కద్దు. దొమ్మేటి సూర్యనారాయణతో కలిసి ‘రంగూన్‌ రౌడీ’ అనే నాటకాన్ని ఆమె దేశవ్యాప్తంగా ప్రదర్శించి మన్ననలు పొందింది. ఆ రోజుల్లో ప్రసిద్ధ రంగస్థల నటీనటులచేత రికార్డింగ్‌ కంపెనీలు నాటక పద్యాలు పాడించి వాటిని రికార్డులుగా విడుదల చేసేవారు. వాటిలో కన్నాంబ పాడిన ‘కృష్ణం భజే రాధా’ అనే ప్రైవేట్‌ రికార్డు శ్రోతల్ని వుర్రూత లూగించింది.
‘హరిశ్చంద్ర’ సినిమాతో ఎంట్రీ 1935లో దర్శక నిర్మాత పి.పుల్లయ్య మరికొందరు మిత్రులతో కలిసి స్టార్‌ కంబైన్స్‌ అనే సంస్థను నెలకొల్పి ‘హరిశ్చంద్ర’ అనే సినిమా నిర్మాణానికి నడుం బిగించారు. పేరుకి ఆ సినిమాకు టి.ఎ.రామన్‌ దర్శకత్వం వహించారని క్రెడిట్స్‌లో వేసినా ఆ బాధ్యతలు నిర్వహించింది పి.పుల్లయ్య. అందులో అద్దంకి శ్రీరామమూర్తి హరిశ్చంద్రుడుగా నటించగా చంద్రమతి పాత్రకు కన్నాంబకు పిలుపొచ్చింది. అప్పుడు బళ్లారిలో ఆమె హరిశ్చంద్ర నాటకంలో చంద్రమతిగా నటిస్తుండగా దర్శకుడు పుల్లయ్య కన్నాంబను కలిసి తమ సినిమాలో నటించమని ఆహ్వానించారు. అయితే కన్నాంబ ఒక షరతు మీద నటించేందుకు ఒప్పుకుంది. అప్పటికే వాటి బృందంలో 22 మంది కళాకారులు నాటకాల్లో వివిధపాత్రలు పోషిస్తూ వస్తున్నారు. తను సినిమాల్లోకి వెళ్లిపోతే వారంతా ఆర్ధిక ఇబ్బందులకు గురికావలసి వుంటుంది కనుక వారందరికీ ‘హరిశ్చంద్ర’ సినిమాలో నటించే అవకాశం కలిపిస్తే నటిస్తానని కన్నాంబ చెప్పడంతో అందుకు పుల్లయ్య అంగీకరించారు. అలా భీమారావు, పులిపాటి వెంకటేశ్వర్లు, బందరు నాయుడు, ఆకుల నరసింహారావు వంటి రంగస్థల నటులు సినిమా స్టార్లైపోయారు. ఈ సినిమాని కొల్హాపూరులో నిర్మించారు. ఆ చిత్రం బాగా విజయవంతమైంది. బందరు ‘బాలమిత్ర నాటక సమాజం’లో పనిచేస్తున్నప్పుడు వారు ప్రదర్శించే నాటకాలకు కడారు నాగభూషణం ప్రయోక్తగా వ్యవహరిస్తుండేవారు. అప్పుడే నాగభూషణానికి కన్నాంబతో పరిచయం కలిగింది. వారి పరిచయం పెరిగి ప్రణయంగా మారి ఇద్దరూ దంపతులయ్యారు. కన్నాంబ అతణ్ణి ఇష్టపడి పెళ్లాడింది. అయితే నాగభూషణం అప్పటికే వివాహితుడు కావడంతో ఈ వివాహ వార్తను 1941 వరకు వారిద్దరూ అధికారికంగా ప్రకటించలేదు. అలా వారి వైవాహిక జీవితం కడదాకా సాఫీగా సాగిపోయింది.
కన్నాంబ నటించిన రెండవ సినిమా బెజవాడ సరస్వతి టాకీస్‌ వారు నిర్మించిన ‘ద్రౌపదీ వస్తాప్రహరణము’ (1936). ఈ చిత్రాన్ని కొల్హాపూర్‌ మహారాజా వారి కంపెనీలో బ్రిటీష్‌ ఎకోస్టిక్‌ ఫొటోఫోన్‌ యంత్రం మీద చిత్రీకరించారు. మల్లాది అత్యుతరామ శాస్త్రి నాటకాన్ని యధాతధంగా సినిమాగా నిర్మించడం జరిగింది. హెచ్‌.ఎం.రెడ్డి పర్యవేక్షణలో ఈ చిత్రానికి అతని కుమారుడు హెచ్‌.వి.బాబు దర్శకత్వం నిర్వహించారు. సి.ఎస్‌.ఆర్‌.ఆంజనేయులు శ్రీకృష్ణుడుగా నటించగా, ద్రౌపదిగా కన్నాంబ నటించింది. ఇతర పాత్రల్ని దొమ్మేటి సూర్య నారాయణ, దొమ్మేటి సత్యనారాయణ, కొచ్చెర్లకోట సత్యనారాయణ, యడవల్లి సూర్యనారాయణ, నెల్లూరి నాగరాజరావు, కడారు నాగభూషణం, పి.సూరిబాబు, రామతిలకం, నాగరాజకుమారి మొదలగువారు పోషించారు. అదే సమయంలో ‘ద్రౌపదీ మానసంరక్షణం’ పేరుతో మరొక సినిమా విడుదలైంది. అయితే కన్నాంబ నటించిన చిత్రాన్నే ప్రేక్షకులు ఆదరించారు. ఈ చిత్ర విజయంతో బెజవాడ సరస్వతి టాకీస్‌ వారు 1937లో ‘కనకతార’ సినిమా నిర్మించారు. అది కన్నాంబ నటించిన మూడవ సినిమా. అందులో కన్నాంబ కమల పాత్ర ధరించింది. దొమ్మేటి, ఆరణి, సూరిబాబు, కడారు నాగభూషణం, కమల కుమారి ఇతర ప్రధాన పాత్రలు పోషించారు. చందాల కేశవదాసు నాటకాన్ని దర్శకుడు హెచ్‌.వి.బాబు సినిమాగా నిర్మించారు. సముద్రాల రాఘవాచార్య ఈ సినిమా తోనే రచయితగా పరిచయం కాగా, గాలి పెంచల నరసింహారావు సంగీతం అందించారు. ఈ సినిమా కూడా బ్రహ్మాండంగా ఆడడంతో కన్నాంబ పేరు తెలుగు ప్రేక్షకులకు చిరపరిచితమైంది.
1938లో హెచ్‌.ఎం.రెడ్డి ‘గృహలక్ష్మి’ చిత్రాన్ని నిర్మించారు. ఆ చిత్రంలో కన్నాంబ పతాక సన్నివేశంలో ‘సత్యం జయిస్తుంది… ధర్మం జయిస్తుంది’ అని అరుస్తూ పిచ్చిదానిలా రోడ్డు వెంబడి పరుగెడుతుంది. ఈ సన్నివేశ చిత్రీకరణ మద్రాసులో జరుగుతున్నప్పుడు కన్నాంబ నిజంగానే పిచ్చిదానిలా ట్రామ్‌ బండ్లకు అడ్డంగా పరుగెడుతుంటే, నిజమేననుకొని పోలీసులు ఆమెను అరెస్టు చేసేందుకు ఉద్యుక్తులయ్యారు. తరువాత అది షూటింగ్‌ అని తెలిసి తప్పుకున్నారు. కన్నాంబ నటన అంత సహజంగా ఉండేదని చెప్పడానికి ఇదొక ఉదాహరణ మాత్రమే. ఈ సినిమాల కన్నా అత్యంత మంచిపేరు కన్నాంబకు తెచ్చిపెట్టిన చిత్రం శ్రీ భవాని పిక్చర్స్‌ వారు నిర్మించిన ‘చండిక’ (1940). అందులో చండిక పాత్రను కన్నాంబ పోషించగా, వేమూరి గగ్గయ్య, ఆరణి, బళ్ళారి రాఘవ, లలితాదేవి ముఖ్యపాత్రలు పోషించారు. అందులో కన్నాంబ గుర్రపు స్వారి చేయడం, సాహసకృత్యాలు, కత్తి యుద్ధాలు చేయడం ప్రత్యేక ఆకర్షణగా నిలిచింది. పులిపిల్లలతో నటించే సన్నివేశంలో కూడా కన్నాంబ ఎంతో ధైర్యాన్ని ప్రదర్శించిందని ఆ రోజుల్లో చెప్పుకున్నారు. అలా తెలుగు వీరవనితగా కన్నాంబను హిందీ హంటర్వాలీ నాడియాతో పోల్చారు.
సొంత నిర్మాణ సంస్థ ఆవిర్భావం… ముందుగా చెప్పుకున్నట్లు బందరు ‘బాలమిత్ర నాటక సమాజం’లో పనిచేస్తున్నప్పుడు కడారు నాగభూషణానికి కన్నాంబతో పరిచయం కలిగింది. ఆ పరిచయం పెరిగి ప్రణయంగా మారి ఇద్దరూ దంపతులయ్యారు. అప్పుడే ‘శ్రీరాజరాజేశ్వరీ నాట్య మండలి’ నెలకొల్పి ‘కనకతార’, ‘హరిశ్చంద్ర’ వంటి పలు నాటకాలను ప్రదర్శించారు. తరువాత మద్రాసు చేరుకొని ‘శ్రీరాజరాజేశ్వరీ ఫిలిం కంపెనీ’ స్థాపించి సినిమా నిర్మాణానికి పూనుకొన్నారు. 1941లో తొలి సినిమా ‘తల్లిప్రేమ’ నిర్మించారు. దానికి జ్యోతిష్‌ సిన్హా దర్శకత్వం వహించారు. ‘తల్లిప్రేమ’ సినిమా విజయవంతమైంది. దాని తరువాత కడారు నాగభూషణం స్వీయ దర్శకత్వంలో ‘సతీసుమతి’ (1942) చిత్రం నిర్మించి విజయం సాధించారు. ఈ సినిమా తరువాత కన్నాంబ అనారోగ్యం పాలవడంతో రెండేళ్లు సినిమా నటనకు ఆమె దూరం జరిగారు.
తరువాత 1945లో బయటి సంస్థలు నిర్మించిన ‘మాయాలోకం’, ‘మాయా మశ్చీంద్ర’, ‘పాదుకా పట్టాభిషేకం’ అనే మూడు చిత్రాల్లో కన్నాంబ నటించారు. ఆ తరువాత వరసగా హరిశ్చంద్ర’, ‘తులసీజలంధర’, ‘సౌదామిని’, ‘పేదరైతు’, ‘లక్ష్మి’, ‘సతీ సక్కుబాయి’, ‘దక్షయజ్ఞం’ వంటి సినిమాలు స్వంతంగానే నిర్మించి మంచి పేరు సంపాదించారు. కానీ చిత్ర వైఫల్యాలు ఆర్ధిక కష్టాలు తెచ్చిపెట్టాయి. కన్నాంబ ఈ సినిమాలలో నటిస్తూవుంటే, నాగభూషణం దర్శకత్వ బాధ్యతలు చేపట్టేవారు. తరువాత ‘శ్రీవరలక్ష్మీ ఫిలిమ్స్‌’ అనే అనుబంధ సంస్థను నెలకొల్పి ‘వీరభాస్కరుడు’, ‘సతీసావిత్రి’ వంటి మరికొన్ని సినిమాలను నిర్మించారు. అప్పుడు చిత్తజల్లు పుల్లయ్య తనయుడు సి.యస్‌.రావు, నాగభూషణం సంస్థలో పనిచేస్తూ వుండేవారు. సి.యస్‌.రావు పనితనం, కార్యదీక్ష నాగభూషణాన్ని బాగా ఆకట్టుకుంది.
కలకత్తా కాళీ ఫిలిమ్స్‌ వారి ‘శ్రీకృష్ణ తులాభారం’ సినిమా వచ్చిన ఇరవయ్యేళ్ల తరువాత కడారు నాగభూషణం అదే సినిమాను ‘శ్రీకృష్ణ తులాభారం (1955) పేరుతో మరలా నిర్మించారు. చిత్రం అఖండ విజయాన్ని సాధించింది. నాగభూషణం స్వయంగా దర్శకుడైవుండి కూడా ఈ సినిమాకు సి.యస్‌.రావును దర్శకునిగా పరిచయం చేశారు. దర్శకునిగా తెలుగులో రావుకు ఇది తొలి సినిమా. తొలి సినిమాతోనే సి.యస్‌.రావుకు మంచి పేరొచ్చింది. ఈ చిత్ర విజయం సి.ఎస్‌.రావుని ఒక ఇంటివాణ్ణి చేసింది. కన్నాంబ-నాగభూషణంల దత్త పుత్రిక రాజేశ్వరిని సి.ఎస్‌.రావుకు ఇచ్చి పెళ్లి జరిపించారు. అంతకుముందు 1950లో వచ్చిన ‘పల్నాటి యుద్ధం’ సినిమాలో నాయకురాలు నాగమ్మ పాత్రను కన్నాంబ పోషించగా, బ్రహ్మనాయుడిగా డాక్టర్‌ గోవిందరాజుల సుబ్బారావు నటించారు. కన్నాంబకు ఈ చిత్రం మంచి పేరు తెచ్చిపెట్టింది. ఈ సినిమాను పండిత జవహర్‌ లాల్‌ నెహ్రు చూసి మెచ్చుకొని, ఇందిరా గాంధికి చూపించడం కోసం మరలా ప్రదర్శింపచేయించుకున్నారట.
సొంత సినిమాల పరాజయ పర్వం… 1951 తరువాత కన్నాంబ సొంత చిత్ర నిర్మాణ సంస్థ నిర్మించిన సినిమాలు వరసగా పరాజయం పాలవుతూ వచ్చాయి. ఆ సంవత్సరం కడారు నాగభూషణం దర్శకత్వంలో ‘సౌదామిని’ చిత్రాన్ని నిర్మించారు. అందులో కన్నాంబ, అక్కినేని, సియ్యస్సార్, రేలంగి, సూరిబాబు, ఆరణి, దొరస్వామి, ఎస్‌.వరలక్ష్మి నటించారు. సముద్రాల రాఘవాచార్య రచన చేసిన ఈ సినిమా ఆడలేదు. 1952లో నాగభూషణం దర్శకత్వంలోనే ‘పేదరైతు’ అనే సాంఘిక చిత్రాన్ని నిర్మించారు. అందులో కన్నాంబ, అంజలీదేవి, శ్రీరామమూర్తి, రేలంగి ప్రధాన పాత్రలు పోషించారు. ఈ సినిమాకూడా పరాజయంపాలై అప్పులను మిగిల్చింది. ఎ.వి.ఎం సంస్థకు పోటీగా ‘నాగులచవితి’ అనే సినిమాను నిర్మించి వారికి పోటీగా విడుదల చేసి నష్టపోయిన సంఘటనలు వీరి కుటుంబానికి ఎన్నోసార్లు అనుభవమయ్యాయి. సంవత్సరం విరామం తరువాత కన్నాంబ స్వయంగా ‘సతీసక్కుబాయి’(1954) చిత్ర నిర్మాణానికి పూనుకున్నారు. అయితే అప్పటికే ‘సతీసక్కుబాయి’ కథ హక్కులు దర్శకులు కె.వి.రెడ్డి వద్ద వున్నాయి. ఆ సంగతి కన్నాంబకు తెలియదు. ‘సతీ సక్కుబాయి’ చిత్రాన్ని రాజేశ్వరి ఫిలిం కంపెనీ వాళ్లు తీస్తున్నారని తెలిసి కె.వి.రెడ్డి కన్నాంబను కలిసి విషయం ఆరాతీశారు.
కన్నాంబ కన్నీళ్లు పెట్టుకొని ‘రెడ్డి గారూ ఈ సినిమా హక్కులు మీవద్ద వున్న విషయం నాకు తెలియదు. మేము రెండు సినిమాలు నిర్మించి అప్పులపాలయ్యాం. నాగభూషణం గారు చెబితే వినకుండా పేదరైతు, సౌదామిని సినిమాలు నిర్మించారు. మేము అప్పులబారి నుంచి బయటపడాలంటే వేరే మార్గం లేదు. సక్కుబాయి సినిమాకు జనాదరణ లభిస్తుందనే ధైర్యంతో సినిమా మొదలు పెట్టాము. సహకరించండి’ అంటూ ప్రాధేయపడింది. దాంతో దర్శకుడు కె.వి.రెడ్డి ఆ హక్కులు కన్నాంబకు ఇచ్చివేశారు. ‘సతీ సక్కుబాయి’ సినిమా బాగా ఆడింది. సినిమా నిర్మాణంలో కష్టనష్టాలు వచ్చినా గాని కన్నాంబ కళాకారులకు, సాంకేతిక సిబ్బందికి టంచనుగా నిబద్ధతతో పారితోషికాలు, జీతాలు అందజేసేవారు. కన్నాంబ దాతృత్వం గురించి ఆరోజుల్లో ఎన్నో కథలు చెప్పుకునేవారు. హాస్యనటుడు పద్మనాభం కూడా మద్రాసులో అడుగు పెట్టినప్పుడు భోజనంపెట్టి, వసతి కల్పించిన సాధ్వీమణి కన్నాంబ. వీరి కంపెనీలో భోజనం చెయ్యని కళాకారుడు ఆ రోజుల్లో వున్నారంటే ఎవరూ నమ్మేవారు కాదు. రాజరాజేశ్వరి దేవిని కన్నాంబ నిష్టతో పూజించేవారు. ఆ దేవి పూజ చేయకుండా షూటింగుకు వెళ్లిన దాఖలాలు లేవు.
తమిళంలోనూ అగ్రస్థానమే… కన్నాంబకు తమిళంలో మంచి మార్కెట్‌ వుండేది. 1940లోనే ఆమె ‘కృష్ణన్‌ తూట్టు’ సినిమాలో ద్రౌపదిగా నటించింది. ఆమె తమిళ ఉచ్చారణకి స్థానికులే విస్తుపోయేవారు. 1942లో కన్నాంబ నటించిన ‘కణ్ణగి’ చిత్రం సూపర్‌ డూపర్‌ హిట్టయింది. ఆ చిత్రంలో కన్నాంబ నటించేనాటికి ఆమెకు 31 సంవత్సరాలు. తొలుత ఆమె సరసన కోవలన్‌ పాత్ర పోషణకు త్యాగరాయ భాగవతార్‌ను తీసుకుందామని అనుకొని, వీరి జంట మధ్య వయోభేదం ప్రస్పుటంగా కనిపిస్తుందేమోనని ఆ పాత్రకు చిన్నప్పను తీసుకున్నారు. కన్నాంబ నటన ముందు తను తేలిపోతానేమోనని చిన్నప్ప దర్శకుడు మణి వద్ద వాపోతే కన్నాంబే ధైర్యం చెప్పి అతని చేత నటింప జేసింది. ఈ సినిమాను ఆరోజుల్లో కోటి మంది ప్రేక్షకులు చూశారని పత్రికలు రాశాయి. 110 సెంటర్లలో ఈ సినిమా వందరోజులు ఆడి రికార్డు సృష్టించడం ఒక విశేషం. ఈ సినిమా కన్నాంబకు తమిళంలో కేవలం మూడవది మాత్రమే. దాంతోనే తమిళంలో కూడా కన్నాంబకు స్టార్డం లభించింది.
తమిళులు కన్నాంబను కణ్ణగి అనే పిలుస్తుంటారు. ఆమె 1944-63 మధ్య కాలంలో చాలా తమిళంలో సినిమాల్లో నటించారు. ‘మహామాయ’, ‘తులసి జలంధర’, ‘దైవనీతి’, ‘నవజీవనం’, మంగైయర్కరాశి’, ‘సుదర్శన్‌’, ‘ఎలైవుళవాన్‌’, ‘మూండ్రు పిళైగళ్’, ‘పెన్నరాశి’, ‘తికుప్పిన్‌ తరం’, ‘మక్కలైపేట్ర మగరాసి’ సినిమాలు మచ్చుకు కొన్ని మాత్రమే. ఇక తెలుగు సినిమాల విషయానికి వస్తే అంజలీ పిక్చర్స్‌ వారి ‘అనార్కలి’ చిత్రంలో జోదాబాయిగా నటించి మెప్పు ప్పొందింది. ‘వదిన’, ‘చరణదాసి’, ‘ఉమాసుందరి’, ‘తోడికోడళ్ళు’, ‘ఆడపెత్తనం’, ‘శ్రీకృష్ణమాయ’, ‘కార్తవరాయని కథ’, ‘మాంగల్య బలం’, ‘రాజమకుటం’, ‘రేచుక్క-పగటిచుక్క’, ‘అభిమానం’, ‘మాబాబు’, ‘పెళ్లి తాంబూలం’, ‘ఉషాపరిణయం’, ‘లవకుశ’, ‘పరువు-ప్రతిష్ట’ వంటి సినిమాల్లో చక్కటి నటనా పటిమను ప్రదర్శించి ప్రేక్షకుల ఆదరణకు పాత్రురాలయ్యింది. తెలుగులో కన్నాంబ నటించిన ఆఖరి చిత్రం నాగయ్య నిర్మించిన ‘భక్తరామదాసు’. అందులో రామదాసు భార్యగా కన్నాంబ నటించింది. టాకీ సినిమాలు వచ్చిన కొత్తల్లో కన్నాంబ తన పాత్రలకు అవసరమైన పాటలు తనే పాడుకునేవారు. తల్లిప్రేమ చిత్రంలో ‘జోజో నందబాల’, ‘ముగ్గురు మరాఠీలు’ చిత్రంలో ‘స్త్రీ భాగ్యమే భాగ్యము’, ‘పల్నాటి యుద్ధం’ చిత్రంలో ‘తెర తీయగరాద’ వంటి పాటలు బాగా ప్రాచుర్యంలోకి వచ్చాయి. సొంత బ్యానర్‌ మీద కన్నాంబ 30 సినిమాల దాకా నిర్మించారు. ‘నవజీవనం’ అనే సినిమాకు రాష్ట్ర బహుమతి లభించింది. రెండు భాషల్లో ‘దక్షయజ్ఞం’ చిత్రం నిర్మించి భారీగా నష్టపోయారు. కన్నాంబ 7మే 1964న 52 ఏళ్ల పిన్న వయసులోనే చెన్నైలో కాలధర్మం చెందారు. ఆమె అంతిమయాత్రకు ఎమ్జీఆర్‌తో సహా తెలుగు, తమిళ చిత్రపరిశ్రమలో వున్న ప్రతి ఒక్కరూ హాజరై అంజలి ఘటించడం…ఆ అదృష్టం ఒక్క కన్నాంబకే దక్కడం ఆమె పుణ్యఫలం. అయితే కన్నాంబ భర్త మాత్రం అతి దయనీయమైన స్థితిలో ఒక చిన్న హోటల్‌ గదిలో ఉంటూ 1976లో చనిపోయారు.
చిరంజీవి సినిమా వస్తుందంటే ఆయన అభిమానులకే కాదు.. ప్రతి తెలుగు ప్రేక్షకుడికీ ఆసక్తి ఉంటుంది. రీఎంట్రీ తర్వాత వరుస సినిమాలు చేస్తున్న ఆయనకు ఈ ఏడాది ‘ఆచార్య’ కాస్త గట్టిగానే షాక్ ఇచ్చింది. అయితే, ఈ దసరాకు ‘గాడ్‌ఫాదర్‌’గా తనదైన వినోదాన్ని పంచడానికి సిద్ధమయ్యారు. మరోవైపు లూసిఫర్ మలయాళంలో చాలా పెద్ద హిట్‌ మూవీ. మోహన్‌లాల్‌కి ఉన్న చరిష్మాను మరో రేంజ్‌లో ఎలివేట్‌ చేసింది. పృథ్విరాజ్‌ కెరీర్లో డైరక్టర్‌గా గోల్డెన్‌ ఫిల్మ్. తెలుగులోనూ అనువాదమై ఓటీటీల్లో అందుబాటులో ఉంది. అన్నా చెల్లెలు, ఓ రాష్ట్రం సీఎం, ఫ్యామిలీ ఇబ్బందులు, పొలిటికల్‌ ఇష్యూస్‌.. స్థూలంగా ఇదే కథాంశం. ఇదే కథను తెలుగు నేటివిటీకి తగినట్లుగా ఎలా తెరకెక్కించారు? కింగ్ మేకర్‌గా చిరు మెప్పించారా?.. మాతృకతో పోలిస్తే ఏవి మెరుగ్గా ఉన్నాయి?.. సల్మాన్‌, నయన్‌, సత్యదేవ్‌ పాత్రలు అదనపు ఆకర్షణ తెచ్చాయా? తెలుసుకోవాలంటే రివ్యూలోకి వెళ్దాం..
రాష్ట్ర ముఖ్యమంత్రి పి.కె.రామదాసు (పీకేఆర్‌) మరణం తర్వాత రాజకీయ శూన్యం ఏర్పడుతుంది. సీఎంగా ఎవరిని ఎంపిక చేయాలన్నదానిపై జన జాగృతి పార్టీ (జేజేపీ) తర్జనభర్జన పడుతుంటుంది. పీకేఆర్‌ స్థానంలో అధికారాన్ని హస్తగతం చేసుకుని సీఎం కావాలని అతడి అల్లుడు జైదేవ్‌ (సత్యదేవ్‌) భావిస్తాడు. అందుకు పార్టీలోని కొందరు దురాశపరులతో చేతులు కలుపుతాడు. అయితే, పీకేఆర్‌కు అత్యంత సన్నిహితుడు, ప్రజాదరణ కలిగిన నాయకుడు బ్రహ్మ తేజ (చిరంజీవి) మాత్రం జైదేవ్‌ సీఎం కాకుండా అడ్డు నిలబడతాడు. దీంతో జన జాగృతి పార్టీ నుంచి, అసలు ఈ లోకం నుంచే బ్రహ్మను పంపించడానికి జైదేవ్‌ కుట్రలు పన్నుతాడు. మరి ఆ కుట్రలను బ్రహ్మ ఎలా ఎదుర్కొన్నాడు? జైదేవ్‌ నీచుడన్న విషయం జైదేవ్‌ భార్య సత్యప్రియ (నయనతార)కు ఎలా తెలిసింది? రాష్ట్ర పాలన దురాశపరుల చేతిలో పడకుండా బ్రహ్మ ఎలా అడ్డుకున్నాడు? ఇంతకీ బ్రహ్మకు, పీకేఆర్‌కు ఉన్న సంబంధం ఏంటి? మధ్యలో మసూద్‌ భాయ్‌ (సల్మాన్‌) ఎవరు? తెలియాలంటే సినిమా చూడాల్సిందే.
మ‌ల‌యాళ సినిమా లూసిఫ‌ర్‌ను దాదాపు తెలుగు ప్రేక్షకులంద‌రూ చూశారు. ఆ సినిమాను తెలుగులో గాడ్ ఫాద‌ర్‌గా రీమేక్ చేయ‌ట‌మేంట‌ని ముందు చాలా మంది భావించారు. కానీ ఇప్పుడు సినిమా చూసిన తర్వాత ఆ అభిప్రాయం త‌ప్పకుండా మార్చుకోవాల్సిందే. సినిమా ప్రధాన కథాంశం అదే తీసుకున్నారు. కొన్ని మెయిన్ సీన్స్ కూడా అదే స్టైల్లోనే చిత్రీకరించారు. కానీ క‌థ‌లో చేయాల్సిన ప్రధాన మార్పుల‌న్నింటినీ చ‌క్కగా చేశారు. మన తెలుగు ప్రేక్షకులకు న‌చ్చేలా మార్పులు చేశారు. అలాగే చిరంజీవి హీరోయిజాన్ని అభిమానులే కాదు.. ప్రేక్షకులు సైతం మెచ్చుకునేలా సిల్వర్ స్క్రీన్‌పై ఆవిష్కరించారు దర్శకుడు మోహ‌న్ రాజా. లూసిఫర్ సినిమాను చూసిన ప్రేక్షకులు సైతం గాడ్ ఫాద‌ర్‌ను చూస్తే కొత్తగా ఉన్నట్లు భావ‌న కలిగింది.
‘‘గాడ్ ఫాదర్‌’ స్క్రీన్‌ప్లే కొత్తగా, ఆశ్చర్యకరంగా ఉంటుంది. మలయాళంలో చూడని పది పాత్రలు ఇందులో వేరే రూపంలో ఉంటాయి. ఇవన్నీ సర్‌ప్రైజింగ్‌గా ఉంటాయి. ఓపిక ఉంటే ‘లూసిఫర్’ని మరోసారి చూసి రండి’’ – ఇదీ ఇటీవల ఇంటర్వ్యూలో దర్శకుడు మోహన్‌రాజా చెప్పిన విషయం. తన స్క్రీన్‌ప్లే, మార్పులపై ఎంత నమ్మకంతో చెప్పారో దాన్నే తెరపై చూపించడంలో విజయం సాధించారు దర్శకుడు. ‘లూసిఫర్’ చూసిన వాళ్లు కూడా ‘గాడ్‌ఫాదర్‌’ను ఎంజాయ్‌ చేస్తారు. పీకేఆర్‌ మరణంతో సినిమా మొదలు పెట్టిన దర్శకుడు, కొద్దిసేపటికే అసలు కథేంటి? సినిమాలో పాత్రల తీరుతెన్నులు వివరంగా చెప్పేశారు. ఇక ప్రేక్షకుడు చూడాల్సింది తెరపై కనిపించే రాజకీయ చదరంగమే. ఈ చదరంగంలో రెండు బలమైన పావులుగా ఒకవైపు బ్రహ్మగా చిరంజీవి, జైదేవ్‌గా సత్యదేవ్‌లు నిలబడ్డారు. ఒక్కో సన్నివేశంలో ఒక్కొక్కరిది పై చేయి ఉంటుంది. అయితే, బ్రహ్మ పాత్ర కీలకం కావడంతో అంతర్లీనంగా అతడే ఒక మెట్టుపైన ఉంటాడు. చిరంజీవి కనిపించే ప్రతి సన్నివేశమూ ఆయన్ను ఎలివేట్‌ చేసిన విధానం స్టైలిష్‌గా బాగుంది. ఆ సన్నివేశాలకు తమన్‌ నేపథ్యం సంగీతం థియేటర్‌ను ఊపేసింది.
లూసిఫర్ తో పోలిక పక్కనపెట్టి ఈ సినిమా వరకు చర్చించుకుంటే చిరంజీవి ఆద్యంతం హుందాగా కనిపిస్తూ వయసుకు తగ్గట్టు కనిపించారు. అయితే ఆయన్నుంచి ఆశించే నామమాత్రపు డ్యాన్సు కూడా ఇందులో లేదు. చివర్లో వచ్చే తార్ మార్ టక్కర్ మార్ లో కూడా సరైన స్టెప్పు ఒక్కటి కూడా వేయలేదు. పైగా దానికి ప్రభుదేవా కోరియోగ్రఫీ. ఎంత చిరంజీవి వయసుని దృష్టిలో పెట్టుకున్నా ఆయననుంచి కనీసం ఖైది 150లో షూలేస్ స్టెప్పులాంటిదైనా ఆయన ఫ్యాన్స్ ఆశించడం సహజం. అది పెద్దగా శ్రమలేని స్టెప్పే. ఆ విషయంలో మాత్రం పూర్తిగా నిరాశ కలిగినట్టే. అసలు తార్ మార్ పాట పెట్టి ప్రయోజనం లేకుండా పోయింది.
ఈ సినిమాకు నీరవ్‌షా కెమెరా హైలైట్‌. మోహన్‌రాజా పల్స్ పట్టుకుని ప్రతి షాట్‌నీ ఎలివేట్‌ చేశారు తమన్‌. తమన్‌ మ్యూజిక్‌కి స్పెషల్‌ అప్లాజ్‌ వస్తుంది. అలాగే తప్పక మెన్షన్‌ చేయాల్సిన మరో పేరు లక్ష్మీభూపాల్‌. ప్రతి మాటనూ శ్రద్ధగా రాశారు. ఆయా కేరక్టర్ల బిహేవియర్‌ని, బాడీ లాంగ్వేజ్‌నీ బట్టి ఆయన రాసిన మాటలు మెప్పిస్తాయి. పూరి జగన్నాథ్‌ కేరక్టర్‌ స్పెషల్‌ అట్రాక్షన్‌. సునీల్‌, షఫి, దివి, గంగవ్వ, బ్రహ్మాజీ, సముద్రఖని,భరత్‌రెడ్డి, అనసూయ.. ఇలా ప్రతి పాత్రకూ స్క్రీన్‌ మీద న్యాయం చేశారు డైరక్టర్‌.
దసరా పండుగనాడు దేశమంతటా రావణ దహన వేడుకలు ఘనంగా జరుగుతాయి. చెడు మీద మంచి సాధించిన విజయానికి సంకేతంగా జరుపుకునే పండుగ. త్రేతాయుగం కాలం నుంచే విజయదశమిని విజయ ప్రస్థానంగా పరిగణించారు. శ్రీరాముడు ఆ రోజే రావణుడిపై దండెత్తి వెళ్లాడట. అందుకే ఈ రోజున రావణాసురుని దిష్టి బొమ్మను తగులబెట్టే సంప్రదాయం ఏర్పడింది. మహార్నవమి నాడు శ్రీరామచంద్రుడు దుర్గాదేవిని ధ్యానించి రావణ సంహారం చేయగా దేవతలు పరమానందభరితులై దేవీ పూజ చేశారు. నాటి నుండి అశ్వీయుజ శుద్ధ పాడ్యమి మొదలు నవమి వరకు దేవీ నవరాత్రులను పదో రోజున విజయదశమిగా జరుపుకోవడం ఆనవాయితీగా వస్తోంది.
రావణ దహనం వెనుక మరో పరమార్థం ఏంటంటే రోజురోజుకీ స్త్రీలపై అత్యాచారాలు పెరిగిపోతున్న ఈ రోజుల్లో పర స్త్రీని తల్లిలా పూజించాలని, లేనిచో రావణుడిలాగా ఏదో ఒక రోజు పాపం పండి దహించుకుపోతారని.. అందువల్ల మనిషిలోని కామ, క్రోధ, మద, మాత్సర్యాలను నశింప చేసుకోవాలని రావణ దహనం సందేశం ఇస్తుంది.
రావణుడికి పూజలు మనదేశంలో సీతారాములను ఆరాధ్య దైవాలుగా భావించినట్లే మనదేశంలోని కొన్ని ప్రాంతాల్లో రావణుడిని పూజించే సాంప్రదాయం కూడా ఉంది. ఉత్తరప్రదేశ్ లోని కాన్పూర్ లో రావణుడికి ఒక మందిరం ఉంది. అక్కడి వాళ్లంతా దసరా రోజున రావణాసురుడిని పూజిస్తారు. ఆ రోజున ఆయనకి ఇష్టమైన నైవేద్యాలను సమర్పించి ఆలయం తలుపులు మూసి వేస్తారు. మళ్లీ దసరాకి మాత్రమే ఈ ఆలయం తలుపులు తెరవడం విశేషం.
రావణుడి పేరుతో గ్రామం మధ్యప్రదేశ్ లోని ‘విదిశా’ ప్రాంతంలో రావణుడి పేరున ఓ గ్రామం వుంది. ఈ గ్రామంలో రావణుడికి ఒక ఆలయం ఉంది. ఈ ఆలయంలో రావణుడు శయనిస్తున్నట్లుగా ఉంటాడు. ఆయన విగ్రహం 10 అడుగుల పొడవు ఉండటం ఆశ్చర్యం. ఇక్కడ రావణుడికి అనునిత్యం పూజలు చేస్తారు. ఆయనకి ఇష్టమైన నైవేద్యాలను సమర్పిస్తారు. అక్కడి వాళ్లంతా రావణుడిని ‘రావణ బాబా’ అని పిలుస్తూ తమ కష్టనష్టాలు చెప్పుకుంటూ ఉంటారు. ఇలా అక్కడి ప్రాంతం వారి కష్టాలను ఆ రావణ బాబా తెరుస్తాడు అనే నమ్మకం కూడ ఉంది. ఏది ఏమైనా దసరా సంస్కృతిలో రావణ దహన సంప్రదాయం తరతరాలుగా కొనసాగుతోంది.
విజయానికి ప్రతీక విజయ దశమి. చెడుపై మంచి సాధించిన చిహ్నంగా ఈ పండుగను జరుపుకుంటారు. తెలుగు రాష్ట్రాలకే పరిమితం కాకుండా దేశ వ్యాప్తంగా దసరా పండుగను ప్రజలు పెద్ద ఎత్తున జరుపుకుంటారు. విజయ దశమి తమ జీవితాల్లో కొత్త విజయాలను తీసుకురావాలని కోరుకుంటారు. దసరా అనగానే ఠక్కున గుర్తొచ్చేది జమ్మి చెట్టు. మరీ ముఖ్యంగా తెలంగాణ ప్రాంతంలో జమ్మి ఆకులు ఇచ్చిపుచ్చుకునే సంప్రదాయం ఎక్కువగా కనిపిస్తుంది. అలాగే పాలపిట్ట దర్శనానికి కూడా ఎంతో ప్రాశస్త్యం ఉంటుంది. దసరా రోజు కచ్చితంగా పాలపిట్టను చూడాలని భావిస్తుంటారు. ఇంతకీ పాలపిట్టను చూడాలనే ఆచారం ఎందుకు వచ్చింది.? దీనికి వెనక ఉన్న అసలు కారణమేంటి.? లాంటి విషయాలు మీకోసం..
మన తెలుగు రాష్ట్రాల్లో గ్రామీణ ప్రాంతాలు చాలా ఎక్కువ. పల్లెటూరి వాతావరణంలో దసరా పండుగ పూట పాలపిట్ట తళుక్కున మెరిసి అందరికీ ఆనందాన్ని పంచుతుంది. విజయాలకు ప్రతీకగా చెప్పుకునే విజయదశమి రోజున పాలపిట్టను చూస్తే కచ్చితంగా శుభాలు జరుగుతాయని, ఏ పని ప్రారంభించినా కచ్చితంగా విజయం సాధిస్తారని చాలా మంది నమ్ముతారు. అందుకే విజయదశమి(దసరా) రోజున పాలపిట్టను చూడటాన్ని ప్రజలు ఎంతో అదృష్టంగా, శుభ సూచకంగా భావిస్తారు.
పురాణాల ప్రకారం పాండవులు అరణ్య వాసాన్ని ముగించుకుని తమ రాజ్యానికి తిరిగొస్తుండగా పాలపిట్టను చూశారట. అదే రోజు విజయదశమి ఉండటం వల్ల అప్పటి నుంచి పాండవులకు తిరుగనేదే లేకుండా ప్రతి ఒక్క విషయంలో విజయాలు వరించాయని శాస్త్రాలలో పేర్కొనబడింది. అప్పటినుంచి దసరా పండుగ రోజున మగాళ్లు అడవికి వెళ్లి మరీ పాలపిట్టను చూడటం అలవాటుగా చేసుకున్నారట. అప్పటినుంచి ఈ సంప్రదాయం ప్రతి ఏటా కొనసాగుతూ వస్తోందని పెద్దలు చెబుతారు.
త్రేతా యుగంలో రావణాసురుడితో యుద్ధం చేయడానికి శ్రీరాముడు బయలుదేరి వెళ్లే సమయంలో విజయ దశమి రోజునే పాలపిట్ట ఎదురు వస్తుంది. ఆ తర్వాత జరిగిన యుద్ధంలో రాముడు విజయం సాధించి.. సీతమ్మను రావణ చెరనుంచి తీసుకువస్తాడు. ఆ తర్వాత ఆయోధ్యకు రాజుగా మారుతాడు. పాలపిట్టను విజయానికి సూచికగా భావించడానికి ఇదొక కారణం.
సాధారణంగా జనావాసాలకు దూరంగా చెట్లు ఎక్కువగా ఉండే ప్రాంతాల్లోనే ఈ పాలపిట్టలు కనిపిస్తుంటాయి. అందుకే జమ్మి ఆకుల కోసం వెళ్లిన సమయంలో ఈ పక్షిని చూస్తుంటారు. నీలం, పసుపు రంగులో ఉండే ఈ పక్షి రూపం కూడా ఎంతో బాగుంటుంది. పాలపిట్టను పరమేశ్వరుడి స్వరూపంగా భావిస్తుంటారు. అందుకే దసరా రోజు ఈ పక్షిని చూస్తే ఏడాదంతా విజయలు అందుతాయని విశ్వాసం.
అయితే.. ప్రస్తుతం అడవులతో పాటు ఇప్పుడు పాలపిట్ట జాడ కూడా కనుమరుగవుతోంది. పల్లెటూళ్లలో అక్కడక్కడా ఓ మెరుపు మెరుస్తున్నట్టు కనిపిస్తున్నా నగర శివార్లలో మాత్రం పూర్తిగా కనిపించడం లేదు. మరోవైపు దసరా రోజున పాలపిట్టను తప్పనిసరిగా చూడాలనే ప్రజల విశ్వాసాన్ని కొంత మంది సొమ్ము చేసుకోవడానికి చూస్తున్నారు. పాలపిట్టను పంజరాల్లో బంధించి తీసుకొచ్చి శుభాలు కలుగుతాయంటూ ప్రజలకు చూపిస్తున్నారు.
సుప్రసిద్ధ శ్రీ కుక్కే సుబ్రమణ్యస్వామి దేవస్థానం కర్నాటకలోని దక్షిణ కన్నడ జిల్లా సుల్య తాలూకాలోని సుబ్రమణ్య అనే గ్రామంలో ఉంది. ఇక్కడ కార్తికేయుడిని సర్ప దేవుడు సుబ్రమణ్యునిగా భక్తులు ఆరాధిస్తారు. గరుడికి భయపడి దివ్య సర్పం అయిన వాసుకి, ఇతర సర్పాలు సుబ్రమణ్యుని చెంత శరణు పొందాయని పురాణాలు చెబుతున్నాయి.
పురాణ చరిత్ర సుబ్రమణ్వస్వామి, వినాయకునితో కలిసి తారకాసురునిపై యుద్ధం చేస్తారు. ఈ యుద్ధంలో అసుర సంహారం జరుగుతుంది. అనంతరం ఇక్కడ విశ్రమించిన స్వామి వేలాయుధాన్ని ధార నదిలో పరిశుభ్రం చేస్తారు. దీంతో ఈ నదిని కుమారధార అని పిలుస్తారు. రాక్షస సంహారం చేసిన కుమారస్వామికి దేవేంద్రుడు తన కుమార్తె దేవసేనతో మార్గశిర శుద్ధ దశమి నాడు వివాహం జరిపిస్తారు. సాక్షాత్తూ స్వామివారి వివాహవేదిక కావడంతో ఈ క్షేత్రం మరింత ప్రాశస్త్యం చెందింది. పశ్చిమ కనుమల్లోని ఏడు పరశురామ ప్రతిష్ఠాపిత క్షేత్రాల్లో కుక్కె సుబ్రమణ్య ఒకటి కావడం విశేషం. శంకర భగవత్‌పాదులు సుబ్రమణ్య భుజంగ స్తోత్రంలో కుక్కెలింగ అని ప్రస్తావించారు.
నాగులకు రక్షకుడు నాగుల్లో శ్రేష్టుడు వాసుకి. ఆయన క్షీరసాగర మథనంలో కవ్వానికి తాడులాగా వ్యవహరించాడు. గరుత్మంతుడి బారినుంచి రక్షించాలని కోరుతూ ఇక్కడ కొండల్లో అనేక కఠోరమైన తపస్సు చేశాడు. తపస్సుకు అనుగ్రహించిన మహేశ్వరుడు అతనికి వరమివ్వాలని సుబ్రమణ్యస్వామిని ఆదేశిస్తారు. దీంతో స్కందుడు వాసుకికి ప్రత్యక్షమై కుక్కె క్షేత్రంలో నాగులకు రక్షణ వుంటుందని వరమిస్తాడు. దీంతో నాగులకు ఇది రక్షణ క్షేత్రమైంది. ఇప్పటికీ ఈ క్షేత్రంలో అనేక వందల సర్పాలను మనం చూడవచ్చు. సుబ్రమణ్య మందిరంలో అనేక పుట్టలు వుంటాయి. ప్రధాన మందిరంలోని స్వామి ఆదిశేషు, వాసుకిలపైన ఉండి పూజలు అందుకుంటారు. సర్పదోష నివారణ పూజలకు ఈ క్షేత్రం ప్రసిద్ధి. సర్పసంస్కార, నాగ ప్రతిష్ట, ఆశ్లేషబలి… తదితర పూజలను నిర్వహిస్తారు.
కుమారధారలో పవిత్రస్నానం శ్రీ సుబ్రమణ్యస్వామి, దేవసేనల వివాహం సందర్భంగా పలు పవిత్ర నదీజలాలను దేవతలు కుమారధారలో కలిపారు. స్వామివారి ఆయుధం వేలాయుధం ప్రత్యక్షంగా మునిగిన ప్రాంతం కావడంతో కుమారధారలో పలువురు భక్తులు పుణ్యస్నానాలు ఆచరిస్తారు. ఈ నీటితో పలు రకాల జబ్బులు తొలగిపోతాయని భక్తుల ప్రగాఢ విశ్వాసం.
ఇలా చేరుకోవాలి మంగళూరుకు 100 కిలోమీటర్ల దూరంలో కుక్కె సుబ్రహ్మణ్యస్వామి క్షేత్రం ఉంది. విమాన మార్గంలో వెళ్లే భక్తులు మంగళూరు ఎయిర్‌పోర్టులో దిగి అక్కడి నుంచి రోడ్డు మార్గం ద్వారా చేరుకోవచ్చు. మంగళూరు రైల్వేస్టేషన్‌, బస్టాండ్‌ నుంచి బస్సు సౌకర్యముంది. బెంగళూరు నుంచి మంగళూరు వైపు ప్రయాణించే రైళ్లు కుక్కె రైల్వేస్టేషన్‌లో ఆగుతాయి.
